C 4 CHILLI ~ C 4 CHENNAI

Moneypur apat Vaigampur I hon zuan suk vengveng a, Howrahpur loudeuh Howrah Junction train station lak khawng a Tamil pau I hon zak khak cheuh leh ana nuam tuam mahmah mawk hi! Yedaku?

Chennai kholum dan koi mun peuh a miteng houlimna ahi chile I khial lawmlawm kei ding hi. Chennai hoh kha hi in hoh khalou hitaleh, a lum dan gen(thei) lou kuamah om din a gintak huai kei bok. A hoh kha nailou te tata bang lum sa pen a pang zomah (lou) uh chih di lah hilou deuh! Chennai ana hoh kha ve tei te toh I houlim chiang in lah kholum dan gen khak veu in a om a, huaiziak tak in Chennai lum taktak mah hiding ahi chihsim in a om hi, chi phet le!

Eilam te’n vaipau I chih chiang un Hindi I chihna uh ahi. A kipah huai mahmah khat ahihleh vaipau Chennai a aki zat louh ahi. Amau mahmah in leng a theih (nop) louh dan uh khawng gen tam se louh a I theihsa uh ahi. Kei bangbang a vaipau siamlou (theilou) te ading in kizen mahmah lehlam hi. Vaigampur a om thouthou dia vaipau theih ngailou chih pen a thawn a om chihna toh kibang kasa hi, chi mawk le!!

Thukal zeh!!

Adyar apat Villivakam hoh dek, bus stop lemchang (kasak) na khat a bus ngak mawk. A bus number chuh thei 47 A. Bus hong tai zel, hong khawl di kasak leh hon tai mang san vengveng. A driver pan thei khial kha ahi di maw ka chi (sim) hi! Israel te kongkhak biang a Belam nou sisan kitat a muh chiang ua Angel ten’ a tai kan jel bang sim in bus in hon tai sansan mai hi. Chennai a ka om tung lai a thil tung ahi hiai, kum 4 khawng pai ta dan ai.

Ka favourite bus ahih leh 23 C ahi. Chennai city bus teng lak ah 23 C tam pen din ka gingta phial hi. A minthang Ritchie street, Spencer plaza I chih te uh Adyar apat 23 C in nuamtak leh bahara tawm chik seng in a tun theih hi. 23 C Chennai central lam a apai louh ziak in Chennai central apat Adyar tan ka pai dek chiang in haksatna lianpi ka tuak zel hi.

Khat vei houh, Chennai central apat Teynampet pai dek. Ka plan ahihleh Central apat LIC tan pai phei a huai apat 23 C a tuan phei di chih ahi. Bus khat a number le ka thei nawn kei, High Court tan pai dek ah ka tuang phei a, conductor pa kiang a LIC ka chih leh, itina hon chi a kenle one ka chi pah hi. Ticket lam zoh ahi phot ta. Mi a tam khol louh toh muang chang deuh a last bench (line) a ka tut leh ka kum nadi mun ah ka kum kha ta kei hi. LIC kheng ta ahi chih ka theih phet in kaki suanglah ziak in ka ding tou chat a kongkhak bul ah next stop a kum teitei di chi in kava ngim chenchen hi.

Bus hong awl tai a, hong khawl petmah hi. Khodak se lou a ka kum khiak zat leh bus stop ana hita kei a, signal ana hi maimah hi! Bus sung a va lut nawn di lah zum huai, lut louh di lah bus stop tung nailou, khe a pai ngai di. Ka buai mahmah hi. Pasal khat kihi sam ven chi in kum fuh lua hileh kilawm awm tak in nisa nuai ah khe in ka pai fanfan hi. Vangphat huai tak in bus stop ana om pah vanglak a, kaki pak gu sim hi. Kipak kawm in huai bus stop a khol di bus te ka hon en ta a, kei bus 23 C ana om ta kei hi, maizen! Sawt lou nung in bus khat hong khawl a, khotual khat kiang apat Teynampet pai di ahi chih ka confirm pah ngal hi. Mengcha bang in ka diang lut pah a, bus sung kon et leh denlam a ka tuan na sa mah High Court a pai di pen ana hi zomah lai hi. Mipiten’ le lamdang sa ahi di ua, hon en ut thei mahmah uhi. Keile ki bolthei sak deuh mai in conductor pa kiang ah a nihvei na ding in bus fee kava sung nawn pah ngal hi.

Thukal zeh beita!!

Khovel a thil om tengteng in a ziak (cause or purpose) a nei chiat uhi. Tamil ten vaipau a theihlouh uh leng bangdang ziak hilou in a deih louh ziak uh ahi. Ka school kaina lui JNV (Jawahar Navodaya Vidyala) India pumpi district teng a om di chih governmrnt scheme himahleh Tamil Nadu ah khat lel leng a om kei thethup hi. A theiten a gen dan un Hindi a deihlouh ziak uh ahi achi uhi. Dik thou ven!!

Joseph leng a ziak om mah in Pathian in a unaute khutlum a thuak ding a phal a, suangkulh a tan ding tanpha leng lem asa hi. Huchi mah bang in Mosi leng a ziak om mah in Pharoah innsung ah a hong khang lian hi.

Joseph leh Mosi tuah bangbang haksatna thuak leng bang I chi ta phet di ua aw ka chi hi! Joseph leh Mosi bangbang in phunlou leh chiaklou in Pathian thu I mang di uam, ahihkeileh phengphi leh phunchiak in I om di uam? Eimah pilna leh hatna te suang in Pathian I taisan kha diam?

Bang ziak a hiai khovel a piang ka hia? Bang ziak a Chennai a om ka hia? Bang ziak ahia? A dawn na nang a ahi.

ITS ALL ABOUT

Its all about

1. An external ideological influence.
2. Personal agenda.
3. Confusion between a Fellowship and a Church.

NU AW, KON IT

NU AW, KON IT

♫ Tunnu itna lian e, tunnu itlou om diam aw; Tunnu itna lian e, kilbang khangkhia momnou teng in, lambang pak nun nuam veni ♫. ~ V. Paukhiansiam.

Hiai la lui ka zakna a sawt mahmah ta a, himahleh hiai lai, nute ni ading biik a gelh dia kakisak laitak in hiai la ka bil ah hong ging nilouh mawk hi. Tunnu itna zaw lian petmah hitah e maw honchi sak hi.

Van nuai a pasal pha penpen leh mikhel penpen ten’ leng a kitheih mohbawl hang ua a haih zawhvual louh uh Nu itna ahi, A langtang in “Nu aw, kon it” chikhe ngam hial kei mahle uh a lungsim tawng pek uah a pianna tunnu a itna uh tuibang in aluang kang ngeikei hi. Khovel a lungtang khauh penpen inleng a pianna nu a itna patbang in a nem hi.

Mihing te naungek ihih lai un, I nute aw ging leh gimnam tanpha I chiamteh thei uhi. I hong khanglian ua, mihing ngeina in a kal lak ah lia leh tang ki-itna in I lungtang a itna omteng hon lakbeisak dimdem nung nangawn in leng I lungtang a pianna tunnu itna ompen thildang bangmah in hon laksak thei kei hi.

Itpen leh ngaihpen te toh Zi leh pasal in I hong kinei ua, Pathian’ vualzawlna toh ta leh nau, tupa leh tunu te tanpha I neih zoh nung nung nangawn in zong I lungtang tawng pek a tunnu itna ompen a kiamthei tuan kei hi.

Tunnu itna la tampi te lak ah, hiai la in gen hoih mahmah hi a katheih ziak in kon gelh tei hi. A phuaktu bel kathei kei hi.

♪Simleitung mi sang zatam lai ah,
Ka pianna tunnu mahngai pen ing;
Amah bang sakmel hoih omkei,
Hong it bang omkei, hong deihsak bang omkei
Hong pahtak bang omkei;
Amah beek ngai peen ing
Amah beek ka pianna Tunnu hi

Tunnu aw hong it pen ing;
Ka ngaihpen tun aw,
Nang hang kei hichiang a tung thei maw
Na nawitui mah khum pen sang,
Na ang sung mah lumpen sa’ng,
Na nungzang mah ihmut lim pen e,
Na angsumg mah bitpen muanhuai pen

Tunnu aw ka lungdamna lian lua e
Lungdamna kong thuk zou ngi kei zong
Hong pahtawi ing e,tunnu aw
Zaila’n hon awi ing
Na khan kumkhua sawt hen
Tu sawn khangsawn dong in
Hongkhanpih lai nu aw
Na thupha hong sunglai aw tun aw♪

Thilpiak leh sum leh pai in Nute hoihna a thuk zou vual kei ding hi, himahleh nute teek nung vuai nung a, itna leh deihsakna toh hoihtak I etkol leh a hoihna uh tamlou beek dinzou ihi ding uhi. Himahleh, kachi nawn ding a, Nu te’n bangtan hon dampih ding uh hiam chih kuan genthei? Teek nung vuai nung a eite (a tate) itna leh deihsakna zaalzou (tang) ding in hing leh dam in hon ompih ding uam? A thei omkei hang maw!Pathian loungal….

Nu leh Pa te, adiak in Nu te it leh zahtak ding bangtak a zahtak zoulou a kana omkhaknate poi kasa petmah hi. Kum 2006 tuhun vel ding in Guwahati ah ka om a, inn mun a ka omlai a ka gen ngamlouh kipahna thute laithon a gelh in ka nu kiang ah ka khak hi. Laithon a muh tak in ka nu a kipak mahmah chih ka naute (ka tute) uapan kazak tak in ka lung a nuam mahmah hi.

Tuni, nute ni in ei a tate uh bangmah hih lou in om maimai kei ni. Nu nei teng in, I nute kiang ah, “Nu aw, kon it” ahihkeileh “Nu aw, kakipak” chih teng beek chithei din Toupa’n thupha hon pechiat hen.

A man loves his sweetheart the most, his wife the best, but his mother the longest. ~ Irish Proverb

BIAKNA, KIPUMPIAKNA LEH VUALZAWHNA

“Koute’n Pathian lam ah Khrist tungtawnin hibang kimuanna ka nei uhi. Koumau apan om banga thil bang peuh ngaihsun dingin koute ka ching uh chihna ahi kei. Koute’ china zaw Pathian apan ahi.” 2 Korinthte 3:4-5

Hinkhua buaina toh kidim hi. Sum leh pai a buaina, damtheihna a buaina, sep leh bawl a buaina, innsung vai a buaina, khotang vai a buaina, saptuam thu a buaina, buaina ngen hi. Bang chiteng in buaina lian in neu taleh hong kipatna bulpi ahihleh Pathian toh kilemlouhna apan ahi (Genesis 32:22-32). Ei deih dan zawng a thil hih I ut ua, ei thuthu a om nuam I sa uhi. Pathian hih utna hinkhua I zang ua, thil hitheilou hinapi in I tawpsan thei tuankei uhi.

A.W Tozer hi chi in ana chi hi “Mi tampi ten’ Pathian thu nak tak in zong mahleh uh lungbuai tak in a om ua, khalam pichinna a neitawm mahmah uh, a ziak ahihleh amau leh amau aki muhsuah nailouh ziak uh ahi. Ki thuneihsak na toh ei deihdan a nasem dia Pathian thu I piak chiang un ei a A nahoih septe a hihbuai hi.”
Pathian ihi kei ua, hih leng ihi ngei sam kei ding uhi. A siamsa mihingte ihi uh.
Pathian hih I sawm laiteng Pathian hihna ana luahsawm setan toh kibang ihi zaw uhi.

Melhoih hih I ut ua, hauhsak hih I ut ua, pil leh siam hih I ut ua, duangching hih I ut ua, thil hoih hi a I theih teng neih vek I ut ua, I neih louh chiang in lungkimlou tak in I om uhi. Ei neihlouhte midangte neih I muh chiang in eng leh deihgawhna mit toh I en uhi.

Hiai buainate’n beini a nei kei ding ua, a hun leh a mun zil in buaina thak hong omzel ding hi. Pathian vaihawm dandan pomsiam louhngal a lampi dang a omkei hi.

Pathian a kipumpiakna:

Pathian a kipumpiakna ahihleh vuallelhna ahikei a, thadah man a paulap leng ahi kei hi. Vualzawhna ahi kipumpiakna. Kipumpiakna in ei a kikhen na di omte ah baihlamtak in kikhenna hon tun hi. Mi dawilok ten’ kikhenna a kihta ua, a kipumpiak ngam kei uhi. Pathian in mi kipumpiak te Ama galdou ding in a sam hi.

C.S Lewis in hichi ana gen hi, “Pathian khutsuakte ihih ziak un, I hinkhua uh Pathian thuneihna nuai a I piak chiang in I hihna diktak hong kilang semsem hi. Jesu Khrist a ka hinna ka piaklut a, Ama deih bangbang a omdia ka kipumpiak chiang in, keimah omzia diktak ka musuah pan hi.”

“Siam a I om bangbang lungkim tak a I pom chiang in, Pathian in ei mizia toh kituak a sep di a bawlte I sem thei pan ding hi.”

NB: Atung a thu khenkhat te Purpose driven life devotional apat laksawn ahi.

KA TAAN DING THILHOIHLOU, KA TANG DING THILHOIH

KA TAAN DING THILHOIHLOU, KA TANG DING THILHOIH

“All Scripture is God-breathed and is useful for teaching, rebuking, correcting and training in righteousness” 2 Timothy 3:16


Ka neulai in ka nu’n hutlou hon nesak zel a, kal khat sung khawng mui-nam himhim hon nesak kei hi. Hutlou nek in mehlim tampi hon ngawl sak di ahi chih katheih man in utlou sasa in ka nu kalauh ziakin kana ne zel hi. Ka nu’n mui-nam I nek leh hut te si lou uh ahi achihziak in ka duhlouhman hilou in, ka damtheihna a dia hoihlou ka gil sung a om hut te a sih vek theih nading un ka duh mahmah mehlim mui-nam leh kamlam(nektheih) te kana ngawl sek hi. Naupang duhgawl mahmah kana hih ziak in a nuam liai kei hi hutlou nek!

Neulai ka chih chiang in salam a kum tawmlai chihna ahithei a, khalam a naupan lai genna leng ahi thei. Ka gen ut pen tak ahihleh khalam toh kisai ahi.

Ka tuailai pih te aw, khalam pichinna manoh a I pailai un, Pathian in ei a om thilhoihlou te paikhe nuam hi chih thei ni. Hon hih siangthou ding in Pathian in I hinkhua uah naktak in panla nuam hi. Ka neulai a ka nu’n hutlou hon neksak bang in, Toupa’n Pathian thu hon nesak(theisak) nuam hi. Hutlou nek in muinam leh nektheih chituamtuam te hon ngawlh sak mah bang in Pathian thu in leng I thilchin hoihlou nek leh dawn te hon ngawl sak ding hi. Hutlou ka nek a neklouh ding kichite ka nek thouthou leh ka hutlou nek man a phat tuam louh mah bang in, Pathian thu ka sim a, hihlouh di kichite ka hih teitei leh ka sim man a omkei hi.

Hut lou kanek peuhmah chiang in ka taan ding bang hiam om chih kathei hi, huchimahbang in Pathian deihlam a hing dia ikipiak chiang in bang hiam taan di om ngei di ahi chih I thei dia, huaite taan ngam a, huai apat vualzawlna, kipahna, damna leh lungkimna muding in ginna toh mansa in om ni.

A langkhat lam ah, damna deihluat ziakin muinam, mehkan leh thil siangthou lou te ngawl zezen mahle, a poimoh pen hutlou ne tuan keileng, gilsung ah damna hon tun tuan kei ding hi. Huchi mahbang in nek leh dawn, tep leh muan ah kideek zou tak a om napi in Pathian thu ngaihsak tuan kei leng khalam pichinna a om ngeilouh ding ban ah, khalam kipahna leh lungmuanna leng a om thei kei ding hi.

Pathian thu hi thil hih thei tak ahi a, khovel ah mi tampite hinna ana heilamdang ta hi. Tuni in leng nang leh kei hinkhua kheng danglam zou ding in thilhihtheihna hiai Pathian thu ah kiningching tak in a omlai hi.Ka hinna khek lamdang tu Pathian thu ahi a, huaiziak in, hinna kheng lamdang zoulou itna thu zaw Pathian thu hiding in ka ginglah deuh hi. [2 Timothy 3:16]

“Kum 10 val paita in ka hinna Pathian khut ah kana pekhe ta a, ka kipat tung in thil tampi ka tawpsan dia hoihte taan ngamlou in, ka hihdia kilawmlou thilte nangawn kava hih kha hi. Hun hong paizel a, kei mi genhak pa, Pathian in hon taisan mailou in, nidang a ka duh ngoihngoih thilte taan ngam ding in hatna hon pia hi. Ka taan tam zoh khop leh ka kipahna a lian semsem a, huai te’n ka taan zoh nailouh thilte apat katan ding kipahna te hon mukhol sak uhi.”

3 Things

Thil Thum (Three things)

“Fight the good fight of the faith. Take hold of the eternal life to which you were called when you made your good confession in the presence of many witnesses.” 1 Timothy 6:12

“Ginna kidouna hoih sual inla, khantawn hinna tuh len chinten in; huai tang dinga sap na hi hi; theihpih tamtakte mitmuhin gupna hoih tuh na gumta hi.” 1 Timothi 6:12


Tulai khovel a mi tengteng deih leh ngaihsang ahihleh theihna ahi. Theihna a manpha a, mi khenkhat theihna hau deuh himhim (Solomon) om mahleh a tam zaw ten sum leh pai, neih leh lam, tha leh zung tampi petmah seng kawm a akingah theihna ahi. Theihna neih bangmah a siatna a om kei a, himahleh theihna in hon tut theih thil hoih leh thil hoih lou te theih masak a hoih gige hi.

Theihna in thupina, thuneihna leh kipahna hon tun thei a, theihna mah in lungkim louhna, hazatna leh ki thupisakna chihte hon tun thei hi. Tuhun a khovel pilna leh siamna, khanglui hun lai a sabet-ngabet a pilna leh siamna, Inn na leh lou nasep, siamgat-khauphan a pilna leh siamna, thugen leh zaideih awih a vualtungtuanna, hiaite tengteng kibang hetkei mah le uh theihna in a gahsuah thilte ahivek uhi.

Theihna I hau semem a buainang a tam deuhdeuh hi. Thil tam I thei lua a gen ding leh gen louh ding pentak I thei zou kei phial hi. Theihna I nei tawm a, khanvual phalou kisakna toh kingaisia in khatveivei mikingai neu taktakte mah I bang khanglang uhi. Na hauh mahmah leh na hat mahmah hun a itna toh kuamah houpih noplouh leh mite nuaisiah tagah, meithai, khutdoh leh dai kilkal a mite na nek sik leh tang na piak chiang in mi kingaineu nahi pan hi.

Bang lou teng thei in, theihlouh di teng thei zezen mahle thil thum tellou in a bukim kei hi. Hiai thil thum te a banban in I en suk di.

1.Na Pathian thei in

Gingtu khenkhat ten’ Pathian hihna diktak a theih louhman un a poimoh lou pi ki siamlouh tangsak in Pathian mai ah maingal lou tak in a om dendan nak uhi. Pathian mai a mohna te thupha puak pen hoih mahmah mahleh, thumna nei zoulou leh Biak Inn kai ut lou zen a kingaihsiatluat a hoih kei hi. A ziak ahih leh Jesu Kris in “mi diktatte sam dia hongpai kahi kei, mikhialte sam dia hongpai ka hizaw” Matthew 9:13b achi hi. Bang chizah teng in sual in hoihkei mahle itna tawplou Agape itna toh hon it gige Pathian ahihziak in eimah chinglou leh hatlou ikisakna te Pathian toh hon kigamla saktu ahihlouh a Pathian toh hon kinaisak tu ahih zawk ding ahi.

“Sanna hiam, thukna hiam, thilsiam dangte himhim hiamin leng, i Toupa Kris Jesua om Pathian itna akipan, honkhen theikei ding chih diktakin ka thei ngala.” Romans 8:39

Pathian hih na diktak theile Ama deihdan thilte I thei dia, niteng hinkhua a thupukna I lak zel na uah thil vom leh thil kang I theih tel mah bang in thil hoih leh hoih lou chiangtak in I thei tel ding uhi. Pathian hihna diktak theihna ding in Laisiangthou (Bible) mah simtam ngai hi.

2.Mahni ki theihchet na - Nang leh nang kithei chian in.

Mi tengteng in salam leh khalam ah hatna leh hatlouhna I nei chiat uhi. Mahni ki theihtel theihna ding in I hatna leh hatlouhna lam chiangtak a theih kul hi. I hatna lam te a hatzaw sem dia panlak a, I hatlouhna lam te ah zong lungkia lou a hatsem dia panlak ding ahi.

Etsakna ding in, Zu ne mi a ding in khalam hih hatlou tu Zu ahi. Huaiziak in, huchibang mi ading in Zu toh kisai himhim, lawm leh vual leh zu inn chihte toh kinai a a om louh ama ading in ahoih pen hi. Huchimahbang in laizial tep mi ading in le. Thum mi in leng thumna a hatsem dia kal a suan ding ahi.

Michih in I hatna leh hatlouhna te theih khiak teitei ding ahi.

3. Na melma thei in

Kuapeuh in bangchi hiamhiam in melma I nei chiat ding uhi. Gingtu khat I hihna ah melma lianpi dou ding I nei gige uh hi hunteng in. Mahni hatlouhna kitheichian lou in melma a dou thei kei ding hi, a melma theilou ahihman in. Bible in “Mi chih amau utnaa pimang leh hipa a om un, khemna a tuak uh ahi jaw hi.” Jakob (James) 1:14. Michih in khemna chituamtuam I tuak maithei, himahleh huai khemna (melma) te I theih leh I tuah hunhun a zou di sa a na om thei gingtute ihi uhi (Joseph leh Daniel hinkhua).

Ka thil tuahsa te apat in khemna thakhat a hong om phut chih ka thei vang mahmah hi, hun tamzaw ah khemna ka tuahte kei mihing utna a pimang a ka omchiang in ahi. Khemna ah ina puk mun mahmah ahimaithei, ahi a, huai khemna pen ana theihsawm lou leh ana chiamteh kha lou le ihi maithei. Tuni apan in khemna I tuahte chiamteh in I lungsim ah panmun ina bawl dia, I tuah nawn hunhun in huai khemnate Pathian hatna toh nuai chimit ni. Kristian Zogam tuailai te aw, Takheh chi in!!

Justice

Lamka as a multi-ethnic town is a fact no body doubt about it.Based on this reasoning, having one particular dialect for AIR link-language may sound unfair, agreed. But it may as well be acknowledged that, the multi-ethnic Lamka town would not have existed without the daring spirits of Zenhang Valte and Phung Kho Thang who were the first settlers. Consequently, for those who think with a neutral and rational mind, the logic behind the choice of a dialect for the first ever AIR in town is justified. Its not about Paite, Thadou, Hmar, bla, bla, bla..... its not about politics neither! Its the outcome of decades long and thorough researched decision, which deserves respect if not cheers!

Ki pumpiak zohna in khalam khanna hon tun

“Be awake! Stand strong in what you believe. Show that you are men. Be strong.” 1 Corinthians 16:13

“Kiveng unla, ginna ah ding kip unla, kihihhang unla, hat takin om un.” 1 Korinth-te 16:16

Zomi laigelhsiam Eugene H Chin Za Hau in mangkang ham a kigelh “The Purpose Driven Life” lekhabu a lehkhiak “Thiltup in a pii hinkhua” ka simkhak apat hoih kasa lua a, kuapeuh in simthei chiat le hoih mahmah ding in ka gingta hi. Hiai lekhabu Zokam a akilehkhiak ma tham in mangkang ham in kana sim khinta a, himahleh Zokam mahmah a ka sim leh thiltampi hon theihbeh sak hi chih kana musuah hi.

Pek 348 a sah hiai lekhabu manphatak gelh tu Pastor Rick Warren ahihleh Lake Forest, California a Saddleback Church kichi saptuam minthang mahmah phut khetu ahi. Aman hiai laibu ah dotna poimoh tak“Bang hih dia hiai khovel a om ka hia?” chih leh Pathian in mihingte bang hih dia hon bawl ahia chihte aban aban in chiangtak in gelh hi. Huai te ahihleh - “Pathian hih kipak tu dia bawl a om I hi (Biakna leh Phatna)”, “Pathian’ innsung mite hidia bawl I hi (Kipolhkhawmna-Fellowship)”, “Jesu Khrist bang a nungta dia bawl I hi (Christ Like)”, “Pathian’ nasem dia bawl a om I hi (Ministry)”, “Tup khat nei dia bawl I hi (Mission)”.

Bible chang tampitak pansan a kigelh atung a thute, hoihtak leh lungsim kihong tak a Bible en kawm a sim te ading in hinkhua zatdan kheklamdang thei lekhabu ahi. Hiai lekhabu nasim chiang in, a kigelh leh kigenkha Bible chang te taisan lou in na Bible ngeingei apan sim teitei in, huchi hileh Bible chang ten’ bang ahia a gen nop chih nathei chiang ding hi. Hiai lekhabu Zokam ham a kigelh ka kiang ah khat a om a, a lunglut ten chiklaipeuh in nahon khel thei di uh.

Lekhabu thu toh kisai hiai zah hiphot henla. I thupi uh kipumpiak leh khalam khanna thu saulou in kikum laile chi ihi.

Mihing khat hingal a thil khat beek a kipumpiak na neilou mi tuh mi hehpih huai ahi. A kim a kiang a thil omdan leh thil piadan in amah thuneih khum ahih ziak in. Na hinkhua a na omdan ding leh thil na ngaih poimoh ding te nang mah in na ngaihsut keileh midang te’n hon thuzoh ding ua, hang san mahmah leh hih hoih mahmah nakisaklai in mi nung zui maimai na hikha ding hi.



Kipumpiakna mulmal neilou mihing, a bah baih a, haksatna a tuah zek chiang in lungkia in a tawpsan jel hi. Huchibang miten’ Krismas chiang kia in kikhop nuam a sa maimah uhi!

Khalam khanna I chihleng kipiakzohna toh pan kom ana ngai dan ahi. Huchilou in zaw khawlmun tung man lou in lungkia in i nungkik kha ding hi. Biakinn ah Pastor te, saptuam upate leh Sunday Skul heutute’n thum dan, Bible sim dan hon hilh hilh mah le uh, a kituah pih kipumpiakna hon sinsak kei uh leh a bukim louh ban ah a hi ding bangtak in a phatuam kei ding hi. Aihleh, Kipiakzohna bang chidan a kisinsak theih ahia leh?

Kris a kipiakzohna kisinsak dan hoihpen tuh midang te a dia et ton tak hidia hin ahi. Hiai chiindan Jesu Kris chiindan ahi. Midang te hichibangin om uh hen i chihleh ei mah hinkhua apat a muh theih di ua i om masak ding ahi. Etsakna ding in, zu dawn a hoihlouh dan mi khat ka hilh ut leh, a thu kia hilou a kei mahmah inleng zu bang ziak a dawn lou kahia chih ka theihsak ding ahi. Huchimah bang in laizial tep leh muamtheih-guihtheih thil tuamtuam te leng.

Mimal a kipumpiakna a omlouh chiang in i tun ding tan i tung zou kei nak hi.

Khovel a milian leh minthang te i et leh, amaute a pil pen, a siam pen, a thei pen leh a hausa pen te ahi pahpah khol kei uhi. Thil khat a hih khempeuh ua mi kipezou te ahi uh. Zomi khangthak te aw, thil i hih khempeuh uah, kipezoutak in hih ni. Lasak i siam leh hoihtak in zum lou hial in sa ni, thugen i siam leh gen ni, laigelh i siam leh gelh ni, music i siam leh Pathian a din kipezou tak in tum ni. Pathian in mi kipezou ahi a zong, naki man hia?

NB: Hiai a tung a thu kigelh khenkhat te Purpose Driven Connection devotional apat laksawn ahi.

Letter

Dear Hmar Brothers,

Lamka is your land, Lamka is our land, Lamka is my land-my forefather's land. Let this be clear, and let us respect our great grandfathers who came to this abandoned and mosquito infected place called LAMKA many many years ago when no one else chose to live.

Let us not grieve their departed soul, who could not live today to see their generations prosper in this beautiful land Lamka.

We can hate and fight one another, till our blood runs dry but some day, today or tomorrow we have to come together and learn to love one another despite our shortcomings because we are one and our destinies cannot be isolated no matter how hard we try.

This moment, this precious moment, let us come and sit together and talk the things which we once did behind closed doors, let us stop this damn cold lingual war, let us be courage enough to disagree, let us stop being PAPER LIONS, instead let us negotiate and come to mutual agreement.

In everything we do, let us be very careful not to hurt each others sentiments. Let us not act out of envy or jealousy. Let us correct one another rather than condemn one another.

On this Centenary year of our cherished Gospel. Let us give righteousness its right place. And let our people get what they deserve.

Think twice, dear brothers.

With Love
dvzomi

Toupa aw

******Hiai la ka tangthu ahi. Nidang in Pathian apan taimang kana sawm a, ka ut teng leh nop kasak teng ka hih khit nung in, kipak mahmah di kakisak leh lungkhamna in ka dim a maban ding ka ngaihtuah chiang in mialna ngen, kinepna mongmong omlou hi. Himahleh, Pathian tapa Jesu Khrist toh kizopna hoihtak ka neihni apan ka nopsak te, ka deih te, ka zaknop te tengteng hong kikhek vek a, hiai tengteng lak ah Pathian phatna lasak nuam kasa mahmah hi. La kasiam louh hang in, ka lunglut mahmah a, lasak kia hilou la gelh leh lakaih bawl lam ah leng ka lunglut hi. Music lam le ka siam lokei a, Guiter kei a di khop ka tumthei sam hi. Tunai zek in Keyboard zil kana kipan a ka hong siampah leng ka lamen. Ka lunglut na lam a hon kithuahpih di Lasak lunglut mi kop pih hon pia in chih Pathian kiang a ka thumna ahi.

Hiai la "Toupa aw" chih ka lagelh tengteng lak a hoih kasak penpen ahi. A thu kia hilou in, a kaih mahmah leng hoih lua kasa. Pathian in damna hon piak leh khat vei tei Pathian phatna la nalh taktak te studio hoihtak a record bawl a khahkhiak ka tup leh ngim ahi. Toupa thupha********

Toupa Aw

Khemna ka douzou lou, khelhna in hon tuam jel.
Toupa aw, hon huhin, na khut hat in (Aw hon huh in)
Mial nasep na leh sual khemna te pan
Suahtakna hon pia'n Toupa

Kong thum hi Pa aw, zahngaihna deih in
Kon bel hi kulhpi muanhuai (Aw Nang na hi)
Lung nopna tak toh zohna la kasa
Toupa min thang den ta hen

Haksatna ka tuah chian, ginlelh na’n hon bawm e!
Toupa aw, hon hilh in, ka thei siamlou (Na lung gel te)
Mahleh kei thu sang, Nang thu hizaw hen
Chi thei din ginna hon pia'n

Nopsakna ka tuah chian, kipahna’n ka dim hi!
Toupa aw, kon phat hi, ka lungdam lua (Halleluiah)
Na gam a dia ka sep theih sunsun te
Toupa hon vualzawl sak in

Copyright David Neihguk

Pathian lemgel

Pathian in lemgel a nei hi sangam
Amah muang te dia a chiam van gam
Lutna lampi hi hamsiatsa i gam
Toupa toh kiton khawm ni

Na lungkham chian Toupa sam in
Na thanem chian Toupa bel in
Na dah luat chian Toupa kiang thum lechin
Lung nopna a hon pia ding
Na dah luat chian.

Na tup leh ngim te na muh louh hun chiang
Na it leh ngaih ten hon taisan hun chiang
Lamet na himhim na neih louh hun chiang
Toupa ah kilam en in

Copyright David Neihguk

Ziltawpni hoih 2

Ziltawpni Hoih 2

Tulai sihna in I lak uah vai a hawm nak mahmah hi. Hun sawt pai nailou February 19 in unaupa Sangpu Langel in hon na beisan a, tunai chik March 29 in Unaupa Joyson in hon na beisan nawn hi. Sih hun zaw mihingte khut hilou Pathian kia khut a om ahi chih hon ngaihtuah sak mahmah.

Mite gen nop louh leh khenkhat te a dia mullit huai leh zak nop huai lou tuh sihna ahi. Pawlkhat te ading in sihna melma lian pen leng hithei hi. Sihna toh kisai in mihingte seh nih in khentheih hi. A khatna ah, sihna lau pawl. Hichibang miten’ sih sang in hing vui a om tel nuam zaw ding un um phial ing!! A nihna ah, hiai toh kilehbulh geih in, sihna lau hetlou pawl a omnawn hi. Hiai pawlte si dia ki pekhe ngam zen a laulou te ahi uh.

A bulbal tak in sutle, sihna mawk lauhlouh chih omthei ding in ka gingta kei hi. Bang chidan a mi khenkhat sihna lau het lou a omthei uh hiam I chih leh thugin khauhtak a neih ziak uh ahi. Hiai thugin in kipiakzawhna tawpkhawk tan a pang ngam din hatna a pia hi. Hichibang thugin omlou pi a sihna mawk lauh lou i hihleh bel lungsim veng chiah lou chihna ahi mai hi. Etsakna din, sihchilh bomb paw te (Suicide bomber) enle, amau te sahkhua ziak hiam ahihkei leh thugin khat ziak a hichibang thil mulkimhuai te mulkimna bei a hih ngam ana hi phiangsan uhi. Sihchilh bomb paw te sinsakna a piak chiang un, sihpih ngam hial di khop a a puaknat di uh thu te hilh in a om uh akichi a mangkang ham in brain wash in a om uh leng akichi. Sihna laulou te’n a ziak a neih mah bang un sihna lau ten leng a sih ut nailouh ziak uh thil khat kia hang hilou in thil tampi hang ahi a chi na laiset ding uhi, dong bang hita zenzen le!

I lungsim ngaihtuahna leh thil khat peuhpeuh a iki piakzawhna ten I om dan, gamtatdan leh khoheidan ah gen a nei tam mahmah uhi. Naupang neu in midang te a enton a, amau hih dandan a thil a hih mah bang in, ginna a naupang mi in gingtu midangte omdan, thumdan, Bible simdan leh Biak Inn kai chiang a thil ken (Bible, Raja! leh adgadg!!) te a enton a, amau om dandan in a om hi. Hiai thilchin hi naupang te leh a kipantung te a ding in thilchiin hoih mahmah ahi. Naupang ahih ziak in.

Himahleh, naupang hong khanglian a midang te hih bangbang mawk hih nawnlou in, ama deih zawng leh ut zawng chih hon nei ta a, ama sia leh pha theihna toh kituak in nouneel tak leh deihtel tak in a hong om hi. Hiai deihtelna toh thil a hih ut te khempeuh ama kipiakzaohna tungtawn a a omdan ensaktu a hong hi uhi.

Laisiangthou thu leh khalam thilte a kipiakzohna a poimoh mahmah a, khalam a piching na Pathian thu a kipiakzawhna kia ah a om hi.

Himahleh tunichiang in, mite’n( a diak in eite’n) thil poimohlou, thil neu chikchik te (Talab nek, Raja Muam, Laizial tep, Zu dawn, leh adgadg) ah nakpi tak in ikipezou ua, ikipiakzawhna uh first class ahi chile I kihal lawmlawm kei ding hi, himahleh a poimoh mahmah thil te (Bible sim, thumna neih, Biak Inn kai, Biak Inn kai chia Bibla tawi, innkuan kikhopna) chih te ah ikipiakzohna uh a chau mahmah hi. Ikipiakzohlouhna uh ak puul dek mah abang zezen hi!! Keile sim tel in.

I Toupa Jesu Kris leng nakpi taka akipiakzoh ziak in sihna tanpha a tuah ding lem asa hi, ei mi nin leh khial hat te sik leh tang a gawtna haksatak thuak kawm a Kros a si dia hong kipumpiakna bangdang ziak hilou in Pathian itna tuibang a luanglet ah nang leh kei ana ikibual sam dia hon deihziak ahi. Hiai thilhihthei itna tuihing a kibual khempeuh ten’ khelh ngaihdamna leh hihsiangthou na a tang uhi. Hiai itna tuihing ah naki bual khata hiam?

Tuni in ki ngaihtuah ni, Jesu Kris a ikipiakzohna uah I chau mahah uhia ahih keileh I hat mahmah uhia? Jesu Kris ah na kipumpiak hia? Amah nang a dia hong kipumpiak eive!

Good quotation

God hears every true prayer and grants either the thing asked, or else something better than it: as a good physician consults for his patient's good better by denying something which the latter asks not for his good, than by conceding a temporary gratification to his hurt. Jamieson, Fausset and Brown

Ziltawpni Hoih 1

“God opposes the proud, but gives grace to the humble." 1 Peter 5:5


Aman huihpi-vuahpi, kawlphia-gialkia, thoukang-thousi leh phalbi-phavang ana thuak tou ngitnget a, 52/53 vei a chin chiang in thupitak leh khekleh zen a lop in a om hi. Aman amasapen hih apoimohpen in a koih kei a, alaita hih leng a thupi ngaih tuan sam kei hi. A kingaih niamna tuh vanbang in a sang a, huaiziakin a ngana hih leng a ut kei lai hi. Huaisang in a tawpna hih a tel zaw a, himahleh a kingaih niamna ziak in amah tuh tawisang in a om a, kumsawt a ngilhmoh din Pathian in a bawl hi [1 Peter 5:5]. Amah ahihleh a hoih mahmah Ziltawpni Hoih ahi.

Zokam leh ham dang adiak in Sapkam ka tehkak chiang in, mun khenkhat ah Sapkam in genchiang zaw kasak na om mahleh mun khenkhat ah Zokam mah in genchiang zaw e kachihna zong a om hi. Sapkam sang a Zokam in genchiang zaw kasak te lak a khat ahihleh I ni sim dan uh ahi. Sapkam a Sunday, Monday, Tuesday, Wednesday, Thursday, Friday leh Saturday kichi pen ei Zokam ah Pathianni, Thohtanni, Thohlehni, Nilaini, Ningani, Ziltawpni leh Kiginni a kichi hi.

Hiai ni min te ei Zokam a kua phuah ana hi a, koi a bang hong chi kipat hiam chih thei kei mahleng Sapkam apat adik atang a kilet hilou peuhmah ding in ka um hi. Sunday kichi pen Zokam a leh di hileh Nini/Nisani/Nipini ahi dia himahleh huai hilou a Pathianni I chih pen uh dik kasak mahmah banah Zomite khuak ngeingei apat hong pawt ahihman in kisak theihpih tham hi in kathei hi.

Pathianni kia hilou in adang teng inle gen anei vek ua, kalteng a I hunzat dan uh a gen chiang mahmah hi. A ni gukna Ziltawpni I chi ua, sinlai te ading in dik diak khol hi in kathei hi. Lungsim zau tak toh kuapeuh sinlai hihang chih I pom theih uleh I vek ua ding in leng a dik mahmah hi.

Kiginni I chi nawn ua, a dik law nawn zel hi. Pathian bia taktak te adia kisakhol kawm a kigingsa a zat tham Pathianni hong tungdek ahih ziak in [Genesis 35:2].

Pathian in a tapa Jesu Kris lemna thu gen ding leh khovel’ khelhna man pe ding in Leitung ah hon sawl hi. Khelhna man sihna ahihziak in Kros ah hong si hi [Romans 6:23]. Bangkim hihthei Pathian in Kros a kilhden ahih ding ni, hun, dakkal, minute leh second tanpha a ut dandan in a tel thei hi.

Mahni angmasial leh mahni ki pahtawi thei lel mihingte lungsim bang pu ahihlouh ziak in Pathian in Ama khawlni lah hi, A miten’ Amah abiak ni uh Pathianni a sih a tel kei a, mi tampite halh leh thathou tak a aom ni uh Thohtanni a sih leng a tel tuan kei hi. Himahleh, Miten’ kalkhat sung a nasep gimna toh chimtaak leh ngaklah tak a nitum a ngak ni uh, ni nanung pen Ziltawpni a sih a tel zaw hi.

Sangam it te aw, I Toupa Jesu Kris sih ni leh I ni sim dan uah zillai sin ding hoihpi khat om hi. Kiniamkhiakna leh kingaihniamna ahi. Eite Pathian, bangkim hihthei nangawn hichitel a a kiniamkhiak leh eite leng Pathian leh I mihin pih te lak ah kiniamkhiak ni [James 4:10]. Pathian leh pawlpi a dia I nahoih sep te kuaman hong phawk pih ta se kei leh lungkham se dah ni. Nahoih sem veve ni. I nahoih sep te hang in min’ hong pahtawi leh ki thupisak se dah ni. Kiniamkhiak veve ni.

Kiniamkhiak ei na ahi a, hih thupina Pathian a ahi. Ei leh ei ki hih thupi zaw lou in Pathian hih thupi a om ngak zaw ni.

Piak tam in itna apiang sak

“But when you give to the needy, do not let your left hand know what your right hand is doing” Matthew 6:3

Ta it lou Pa kua a om dia? Ta it lou Nu kua a om dia? Ta it lou Nu leh Pa om ken chia!

Pa’n ta’ poimoh a thei, ta’ nopsakna ama nopsakna ahi a, ta’ lungkimna ama lungkimna leng ahi hi.

A langtang in mite muh di’n silh leh ten hoih leh kilawm silhsak zoukei mahleh Pa’n khanvual eng din a ta aphalngam kei hi. Mite nek bang muinam leh kamlam lim taktak te nesak zou kei mahleh gilkial a om din Pa’n a ta aphal ngamkei hi.

Nu leh Pa ten’ a tate a itna uh teh theih hileh Nu leh Pa tengteng in a tate chiat a itdan uh akibang kim diam? Mi neizou leh mi neizoulou ten a tate a itdan uh akibang tam?

Tate itna pen a sangzaw pan a niamzaw itna ahihman in a lak lut itna hilou in a piak khiat itna ahi hi. A it tu’ punna hilou in it a ompen’ punna ahi hi. A it tu’ supna pen it a ompen’ punna ahi hi.

LST(Laisiangthou) in na gou omna ah na lungsim a om ding achihbang in (Matthew 6:21), itlou hial a itna piak a om, tate Nu leh Pa te lungsim omna ahi ua, a gou uh leng ahi uhi.

Nu leh Pa te’n a tate a it bang un, khopi-khota, pawlpi-pawlneu, saptuam-kouhtuam a heutu ten’ mahni pawlpi chiat it le uh i gam-i nam leh i mi-i sa te ading in damna hiding hi. Heutute pawlpi ading in Pa ahi uhi. Huchi mahbang in, mipite heutupa adingin a tate ahi uhi. Pa’n a tate ahih bangbang ua a it mahbang in heutu inleng a mipite ama tung a ahoihziak uh leh a neihzoh ziak uh hilou in a tate ahihziak un khentuam neilou in a it vek ding ahi.

Ta hong khanglian a, nu leh pa itna a lian deuhdeuh ahangbel ama ading a tha leh zung tampi seng hive un! Sen a tam deuhdeuh leh itna a lian semsem, hiai itna mah hangin a poimoh bangkim nu leh pan’ kiphaltak in ahun bangzel in a seng zel uhi. Nu leh Pa leh tate ki itna ah Loan a omkei a, thilteng a thawn vek ahi,itna hang in!

Heutu hoih in a la kei a, heutu hoih in a pia tawntung hi. Piak tam in itna a piang sak. Heutu hoih in mimal metna ding a zong kei a, pawlpi metna ding in mimal ah kiamna a telzaw!

Ta it lou Pa kua a om dia? Ta it lou Nu kua a om dia? Ta it lou Nu leh Pa om ken chia! Pawlpi itlou heutu bel omthei hi! Pawlpi it heutu hon pia in Toupa.

Happy Birthday ZCF

“There is neither Jew nor Greek, slave nor free, male nor female, for you are all one in Christ Jesus.” Galatians 3:28

“Huaiah tuh Juda mi a om theikeia, Grik mi leng a om theikei; huaiah tuh bawi a om theikeia, bawi lou leng a om theikei; huaiah tuh pasal leh numei leng a om theikei hi. kris Jesu ah na vek un pumkhat na hi ngal ua.” Galatia-te 3:28

Vuahzu daikai, sun nisa leh zan khomial, gim leh tawl poi salou, neih man hilou itna hang leh awlmohna ziak a sum leh pai, neih leh lam toh a mipihte uh Zomite a dia tha leh zung ana seng a, lamsuk-lamtou, kho dung kho vai teng ana tawn suak phial, meltheihlouh milian leh hamtheihlouh mi nautangte maitang sik leng khawk salou a pan ana la teitei, ana hahkat den leh ana hanchiam tawntung hunpaisa a I heutu te leh tu lel a I heutu te uh hiai ni manpha March 3 2010, I saptuam uh kum 6 a chin ni in zahna sang pen I pia uhi.

Mihing in bang chi teng in makhual mah le hang Pathian pina lou in zaw bangmah a gahsuah thei kei hi.”Except the LORD build the house, they labour in vain that build it: except the LORD keep the city, the watchman waketh but in vain” Psalm 127:1. Singta phawklouh mualdawn vangkhua, giabang zunlouh Zogam apan bawngnawi leh khuai zu luan na gam hon tun I biak Pathian tungah lungdam thu I kou mahmah uhi.

Khangthu a mang ngei nawnlou ding tuni, ei Chennai a om Zomi te adi’n kipumkhatna ni hileh ichi mahmah hi. I ki pumkhatna ziak un Pathian vualzawlna I tang ua, I ki pumkhatna ziak mah un hiai tan I tung uhi. Pumkhatna gen tam thoh leh gelh hat thoh ziak a hong om mawk di ahi zenzen kei hi. I lungsim gamgi te kantan a, eilam a tan zek a ngaih lehleng aman pe ngam ding khop a hangsanna I neih masiah uh kipumkhat taktak chih a om thei kei ding hi. Sup a ngaih leh sum ngam di, ngolh a poimoh leh ngol ngam di, sen a kul leh seng ngam di’n, hiai hangsan na lungsim I lungtang uah chi bang in tuh chiat ni hang.

Saptuam min a kigawm I sawm uh leh a haksa dia, pau leh ham a kigawm I sawm uh leh a haksa dia, beh leh phung a kigawm I sawm uh leh a haksa dia, haksa ding mah ahi.Bangziak in? hiaite a bulpi ahi kei ua, a kahiang maimai ahi uh. I innpi uh Zo ahi a, eite Zomi te ihi uhi. Zomi ah lungkim in, Zomi ah ki inntek sak chiat in, Zomi mit hah a hak in, Zomi lungsim pu in, Zomi tha toh sem khawmle, a kigawmsa, a kipumkhatsa leh innkuan khat ana hisa, mehkuang buhkuang khat sawk khawmsa, a kikhenthei lou Zomite ihi chithei ni hang.

Zomite Pathian in thupha hong pechiat ta hen. Amen

“Khenthamlouh te gibang kikhen kei ni” V. Pau Khan Siam

Hon Domsang

Tuan a simthu sut leng maw, Tual I niam simthu
Theihphaklouh selung mawlte ihi,
Tung Pathian itna vangin, Ei din khua ahong vak
Tun a tate hi hang e.

Phatna zaila lawm ging, Kilawmsemgua toh
Vanglian Toupa min phat in
Tuan a selung mawlte tun a hon domsang ta
Toupa ei din hoih na e!

Itna thu sang kei leng maw, Bang I suak ding hiam?
Toupa itna lian in sang na e!
Zu leh Va bang gammual a, Vakvai a I omlai
Itna in hon zongkhe ta

Itna vang siamnate leh, Sanna te nei hang
Tua khempeuh I Toupa vang a hi
Lamdang in thupi na e, Lou bang ahon khualna
Toupa ei din hoih na e!

Malsawmtu Lalpa

Malsawmtu Lalpa la Malsawmnate
La mite a din chan guallo ahi;
La hepina leh la hauhsakna chu,
Mihing kamsuak in a gen zo seng puai

Chaga gentheite sawmdawltu Lalpa
La lopina din bangkim ka bawlteu;
Chantawk ah lung awi dan ei zil sakin
Mitin lung gilin thu hung gen zing in.

Khanglai leh naupang nupi leh pate
La angsuang zuanin ka hung khawm kit tau;
La thagau thiangthou in ei hung pawl in
Limna kipakna nang ngei chu nahi

La malsawm na thu ka dawnteu hi
La gam a dingin hung mangzel inla
Thil hihtheihnate la dawigual bang in
Hung vuk thak kit in kei uh ding Lalpa.

Khial a mangthang sa

Khial a mangthang sa, Hoihna neilou in
Siamlou tansak sa, Mohna toh kidim in
Kinepna neilou, Suahtak nang neilou
Mikhial kahi

Siamtangsak tu Jesu Khrist ahi
Ka mohna teng hong maisak khin zou
Suahtakna leh damna kamuta
Hon hehpihna a lian lua!

Pa aw na deih lam, kia hih ka ut hi
Kei thu hilou in, nang thu hi zaw hen
Ka tup leh ngim te, Ka sep leh bawl te
Hon makaih in

Hon taisan ngei ken ka Toupa aw
Khemna huihpi leh vuahpi lak ah
Nang kon bel hi ka suangpi nahi
Nang omna zaw muann hi

Thil dang tengteng sang, na manpha zaw hi
Pilna leh siamna, bulpi nang nahi
Sum leh pai te, leh minthanna te
Sang na manpha zaw

Lungnop kichinna nang kia nahi
Nang nei mite tangtawn hinna na pia
Sihna tung a vualzou pa nahi
Ka hauhsakna nang nahi

Khris toh kilhlup khawm kahi

Pathian lam a ka nuntak theih nang
Dan sihsan ka hita
Khrist toh kilhlup khawm kahi ta
Hinapi'n ka hing hi

Pumpi a ka nuntakna pen
Kei dia hong si hong ki pumpiak
Pathian tapa upna pansan
A nungta ka hita

Pathian itna ka nawlkhin kei
A hehpih khotuah na
Siamtanna hon pia thei omlouJesu Khrist kia lou ngal

Bridge:
A hingpa kei kahi ta kei a
Kris keimah sung a hing ahi zaw

Galatians 2:19-20

Eite mahmah

Lushei te la nalhi sa ua, i kithang sak mahmah uhi.
Huchi ahihleh chi a,eilam lasiam ten' amau sakdan a hon sak chiang ua lah lusei te a lua chijel.
Thadou te la bang le iki thang sak mahmah ua adiak in zawlla te.
Huchi ahihleh chi a, eilam lasiam ten' amau sak dan a hon sak chiang ua lah bangbang hiam ana chijel.

Eite mahmah kha....!!

Ma I sawn uhi

“Huan, TOUPAN mei dingin hilouin lu dingin a honbawl dinga, a nuainung hilouin a tungnung jel na hi ding uh; TOUPA na Pathian uh thupiak juia, tua ka honpiak pilvang taka poma, tunia thu ka honpiak;” Diuteronomi 28:13 (Paite e-Holy Bible)

From Zero to hero chih hial di hikei mahleh ma chuh I sawm peuhmah ve ua. Hiai tengteng Pathian ziak ahi chih I theih ziak in Toupa Jesu Khrist min I phat masa hi.

A ching lou sasa, a siam lou sasa, a hau lou sasa, a hoih lou sasa, zu leh sa ne a dawi leh kau ana bia ei Zomite Pathian in hong zongkhia ahihman in ei te Pathian in hong it tak pi hi chih hangsantak in chi thei hang. Zomi te’n Tangthupha I zak uh kum 100 ahi ta a, Chennai a Zomi te’n Fellowship I neih uh kum 6 ching ding ahi pan lel hi. Hiai hun tomchik sunga Pathian’ hon pi dan ka muh leh ka theihte apan Zomite te adiak in Chennai Zomite Pathian in hon domsang lellel ahi chih kana mukhia hi.

Ka ngaih tuah mawkmawk sek a, Christian ana hilou bang hile Pathian ni chia kikhop ngai lou dia, Christmas leh Kumthak lop ngai lou dia, sum leh pai thohlom, bituk chihte bang omse lou dia, ei a neilou Zomite a dia hoih mahmah kha zaw ding hiven kachi simsim jel hi.

Himahleh, Pathian in ei Zomite I manthat ding uh a phalngam kei a, neilou sasa hilai mah hong zongkhia ahihman in Pathian in eite ading in thiltup thupitak nei ngeingei ding ahi chih ka gingta tinten hi. Pathian in a zawng gige, neilou gige di’n hon phal kei dia-khat veivei giautau hun omjel mahleh, mi nuai a om tawntung di’n le hon phal di’n ka um kei hi. Ahang ahihleh, A mei ding hilou, a lu hi dinga hon bawl nuam Topa Pathian bia ihih man un. Deuteronomy 28:13

Ma I sawm dan uh gen tam luat ngai lou in I thilhih teng uah chiangtak in a muhtheih hi. Hiaitan I tun na tan uh leng eikhom a din nuam hun thou ta himahleh Pathian in hiai sang a dinmun sangzaw ah hon pi ut lai hi. Hiai dinmun niam apat dinmun sangzaw a hon kaisang sakthei Pathian kia himahleh hiai toh kizuitawn in eilam apan in leng hih ding leh sepkhiak ding na tampi ana omdan ahi hi.

Huai na te ahihleh Biakinn kai ngeilou te Biakinn kai a kaisang na, Bible sim ngeilou te Bible sim a kaisang na, thumna nei ngeilou te thum mi hih a kaisang na, tep leh muan, nek leh don a ki hih siangthou zoulou te siangthouna a kaisangna, mi gensiat hat te mi pahtawitu a kaisang na, buaina bawl te lemna bawltu a kaisang na, phubah lak hat te ngaihdamna toh kidim a kaisangna, itna haulou te itna kiningching a kaisang na, thumang lou te thumanna a kaisang na, zuaugen hat leh mi lepchiah te diktatna leh chihtakna a kaisang na.

Paulam bawl a kisiamtan thoh zaw lou in, ei hih dingte a poimoh bangbang, I hih ut pen te hita se keileh, hih ding in mansa in om gige le, hon kaisang sak di leh hon domsang ding in Pathian aki man gige hi. Hun tamzaw ah Pathian akiman hang in ei ikiman louh man in I kaisang hun ding kipel kha zelzel mah hi.

A sangzaw lam delh a I pai kawmkawm in, Pathian toh pangkhawm in ei tanvou - kikhekna, thumanna, diktatna, siangthouna leh chihtakna te len chinten le mun sangzaw ah Pathian in hon koih ding hi.

Ma I na sawn uh a, masawm na ding tampi a omlai. Tuni in kalkhat suan in pan ni Sanggam!

Zogam lei nibang hong tang hen

Pasian melhoihna,itna maitaina leh,
Kalvari khuavak nibang hong tang hen;
Mittaw khuamial sung pan a sap Zomi te'n,
Mohna kol sung pan gupna a ngahta.

(I Pasian) Minthang hen, minthang hen,
I pasian minthangta hen;
(Zogam lei) Thawnsak un, thawnsak un,
Mualkuam zanglei thawnsak un;
Toupa'n Lam maan hong lak in,
Hong gualzoh pih ding;
Tangzai hen tangzai hen,
Zogam lei nibang hong tang hen.

Gupkhiatna thupha leitung mun khempeuh ah,
A kihilh na'ng in sep ding i nei hi;
Khitui leh Kha toh i sepna khempeuhte,
Toupa gamzai hen, tangzai tawntung hen.

Lamdang itna sisan toh kei hong tankhia,
Leipan vantung kahlei hong dawhsak zou;
Sihna pan gualzo vangletna toh thoukhia,
Tawntung pan tawntung minthang den ta hen.

There is a reason

There is a reason today!
A reason to sing,
There is a season of Praise
The season is now.

The reason of life is You
You're the answers to the questions of life,
You're the only way to eternal life,
Give You praise, because You're my God.

Copyright: David Neihguk

What is a Church?

Thumapi:

Sapkhawm chih ahi kei a, Saptuam chih ahi. Leitung thil toh kibanglou dia sap, Saptuam te ihi tel ve ua! Ahihleh, Saplouh(gingloute) te toh ei Saptuamte ikibat louh na uh bang ahi di chih kingaihtuah tham ching kasa mahmah hi. Hiai bangteng hamphatna, vantung apat chialna(invitation) I neih pen, bang chi bang in I dawng a?? kingaihsun ni.

Saptuamte khalam khantouh nading in kipawlhkhawmna(fellowship) apoimoh mahmah hi. Ginna ziak in innkuan khat ihi ua, innkuan hoih I suah theihna ding un kipawlhkhawm tam angai hi. Pathian deihdan hih Innkuan kituak hihna din Pathian ni chiang kia a Biakinn a kimuhkhawm kia ahuntawk kei a, hiai sang a thukzawsem leh gil zawsem a Pathian thu a kipawlhkhawmna a poimoh hi. Mimal leh Pathian kipawlhna, mimal leh mimal kipawlhna hoih Saptuam a din damna ahi.

Huaiziakin, Kipawlhkhawmna(Fellowship) omlouhna Saptuam tuh Saptuam ihmu ahi. Fellowship omlouhna Saptuamte sahkhua zui maimai Saptuam ahi. Zomi Christian Fellowship hizezen lele a kikhawmte laka fellowship a omtuankei leh a phatuam kei hi.

I poimoh uh Saptuam A Aw B Ch hikei veh aw, Pathian thu a Kipawlhkhawmna(Fellowship) ahi I poimoh uh.

Thulu:

“Huan, ka hon hilh ahi, nang Peter na hi, hiai suangpi tungah ka saptuam ka lamtou ding a, misi kho kulh kongkhakten huai a zoukei ding.” Matthai 16:18 (Paite e-Holy Bible)

“And I tell you that you are Peter, and on this rock I will build my church, and the gates of Hades will not overcome it.” Matthew 16:18 (NIV)


Caesarea Philippi gam ahohlai in hiai atung a thute Jesu Khrist in Peter kiang ah anagen hi.

Church kichi thumal Greek pau in kyriakon (κυριακόν) akichi a huaituh "thing belonging to the Lord" eipau in “Pathian’ thil” chihna ahi. Latin pau in ekklesia (ἐκκλησία) akichi a huaituh "assembly" eipau in “kipawlhkhawmna” chihna ahi. (Wikipedia)

Gingtu kipawlkhawmte leh Pathian biakna mun genna in “Church” akizang. Thukhun Thak hun ah Church kichi thumal in gen nih anei hi, khatna ah Khovel pumpi saptuam (The Church “Universal”), hiai in piangthak tengteng a sisa leh a damlai te ahuap kha vek hi. Nihna ah, The Church “Local”, munkhat a kipawlkhawm, Pathian bia piangthaksa te genna ahi. Jesu Khrist in Peter kianga saptuam agen pen Khovel pumpi saptuam achihna ahi.( McKim, Donald K. Westminster Dictionary of Theological Terms. Westminster John Knox Press, 1996)


Saptuam hong kipatna ahihleh sawltakte(Jesu Khrist nungzuite) hun apat ahi. Hiaithu Laisiangthou sung a Nasepte laibu ah chiangtak in amuh theih hi. Nasepte 2:42 “Huan, sawltakte hilhin, kithuahin, tanghou balkhamin, thumin phatuamngai takin a om nilouhlouh uhi.” “They devoted themselves to the apostles' teaching and to the fellowship, to the breaking of bread and to prayer.” Hiai Bible chang apan in Saptuam omdidan tak ahihleh Sawltakte thugin kisinsakna, kithuahkhawmna (fellowship), tanghou balkhapna(Sacrament) leh thumna mun ahih ding ahi.

Saptuam mohpuakna ahihleh gingtute ginna naupang apan ginna piching a pilut ding ahi. “Huchi-a mihingte diklouhna zekhemna banga lepchiah pila khem tawmtawma oma thuhilhna huih chitenga langkhat langkhata sep leh mut lengleng, naupang i hih nawn louhna dingun.”Ephesate 4:14.


Saptuam ahihleh Jesu Khrist mikhialte adia a sihna leh thawhnawn na theihgige namun ahih ding ahi. “Huai tanghou na nek ua, nou na dawn teng un, a hongpai nawn masiah, Toupa sihna na phuangjak jel uh ahi ngala.” 1 Korinth –te 11:26.


Thumna ngai poimoh, thumna sinsak leh thumna a kingak Saptuam omdan ding him ahi. “Huan, sawltakte hilhin, kithuahin, tanghou balkhamin, thumin phatuamngai takin a om nilouhlouh uhi.”Nasepte 2:42


Nagot thupi(The Great Commission) Matthai 28:18-20 tungtawn in Tangthupha puanzakna nasep Jesu Khrist in muangtak in Saptuamte sepkhiak din hon koih hi.

Hiai khovel ah, Saptuamte Jesu Khrist Khut, Kam leh Khe ihi, Jesu Khrist mahmah sapum leng ihi. 1 Korinth-te 12 :12-27 sim in. Saptuam Jesu Khrist batpih di leh Jesu Khrist nungzui dia phuhkhiak ahi.

Zomite Pathian

Abraham Pathian hing
A ginom Pathian hat
Na thuchiam kipel ngeilou
A tawntung in

Solomon Pathian hat
A muanhuai Pathian pil
Bangkim hihthei nang nahi
Bangkim thei nang nahi

Israel te Pathian
Pathian Immanuel
Bangkim ah nang na om hi
Thil tengteng ah

Thuneitu Pa Pathian
Vangletna toh vaihawm
Bangkim hihthei nang nahi
Bangkim thei nangnahi

Chorus:
Zomite Pathian
Koute Pathian hoih
Ka bitna uh leh ka muanna uh
Aw, Toupa nang nahi

Aw hehpihtu Pathian
Na itna in hon zou
Ka bukimna nang nahi
Ka lungmuan na

Aw nampite Pathian
Pahtawina hon pia ung
Thil tengteng nang kon pia uh
Thil tengteng kon pia uh

Chorus:

Thumna dawngtu Pathian
Nang na nai gige hi
Thil tengteng na hih thei hi
Thil tengteng na thei hi

***With inputs from the song " O God of Abraham" by Don Moen

My priorities in my life

1. Jesus Christ
2. Nation (Zomi Nam)
3. Tribe (Paite)

Deihtelna

“Thil bangkim hih kei dingin a sianga, himahleh thil bangkim hih a hoih kim khol kei; thil bangkim hih kei ding in a sianga, himahleh bangmah sikha din ka kiphal kei hi.”
I Korinth-te 6:12 (Paite e-Holy Bible)


Deihtelna I chih chiang in, mahni a dia hamphatna hon tuntu ding thil tampi lak apat telkhiakna chihna ahi.

Hinkhua ah Pian hun, sih hun leh nu-leh-pa di kuamah teel theih thil ahikei chile dik dingin ka gingta hi. Gendan tuam ah, Pian hun, sih hun leh nu-leh-pa chihlouhsiah mahni deihtelna a kinga liuliau ahi chihna toh akibang geih hi. Hiai deihtelna piak a I om ziak in adiktat Pathian in a siamsa ei mihingte kiangah namphut in kei na hon biak teitei ding uh ahi achikei, huaisang in Amah apan taimang theihna tanpha zalenna honpe tazen hi.

I Niteng hinkhua uh deihtelna in akidim hi chileng diknawn leuleu ding hi. Zing I thou a, bang sahbon zang ding, an I huan a, bang meh huan ding, a hong min a, dak bangzah a ne di, van I lei nuam a, bang rong lei di chih ahinawn. Thohtanni, thohlehni …… Pathianni hong tung a, Biakinn kai di maw kai lou di chih ahi nawn leuleu. Gelhbeh lailai di chile beimoh di abang, hiaile deihtelna mah ahizel.

Tangval Daniel in Kumpipa an leh a dawn uain hiama kihih thanghuailouh ding a deihtel hi. (Daniel 1:8). Zawlnei Jonah in a deihtelna in Pathian thu ana mang kei a, Nineveh khopi a hoh dia sawl a omlai Tarshish khua ah atai daih hi. (Jonah 1:1-3). Mosi in leng a deihtelna in Pathian thupiak ana zui kei a, suangpi apat tui hong pawt dia ahilh thoh ding pen nihvei a sat sese ziak in gamchiam gam Canaan a lut thei kei hi. (Numbers 20:8-12).

Hiai apat deihtelna toh I thilhih khempeuh te agah kilouchiat ding ahi chih muhtheih hi.

I omdan, khohei leh omziate I deihtelna apat hong kipan ahihman in I deihtelte thilhoih ahi hia thil hoihlou chih velthak poimoh mahmah hi. Thil hoih leh thil hoihou I chih chiang in ngaihdan tuamtuam a om hi. Thil khenkhat Laisiangthou(LST) in bangmah agen kei mawk hi, etsakna din – Zudawn, TV leh adang adang. LST in bangmah a gen louhziak a thildik chihna hipahpah tuan lou hi.

Thil khatpeuh, adik leh adiklouh chetna leh dawnna LST a kichiantak I muh keileh, hiai a khol mailou in LST apat zillai(principles) lathei le kichiang pen hi. Huai ding in, deihtelna I bawl dek chiang in hiai anuai a dotna thumte kidong le chiang mahmah ding hi.

Kei a ding in a hoih hia? (“I Korinth-te 6:12)
Ka unaute ading in a phatuam hia? (“Huchiin na theihna jiakin mi hatlou, unau a sih sika Kris in a sih sakpa, a mangthang ding ahi.” I Korinth-te 8:11)
Pathian’ min a hih thupi dia? (“Huchiin, na nek uhiam na dawn uhiam, na hihpeuhmah uah leng, Pathian thupina ding ngenin hih un.” I Korinth-te 8:11)

Nang lou in

Ka Pa uh van a om, ka Pathian
Na siamsa mihing te'n, hon ngai ung;
Lei nopsakna leh pahnate,
Nang tel lou in bukim theilou,
Nang tel lou in bukim lou.

Aw Toupa hong leng in;
Van daitui bang in hong kia in,
Hong veh in, hong pawl in;
Nun nop kimlou, nang tel lou in;
Lungdeih chinglou, nang tel lou in;
Tongdam sannem nang lou in.


Hondampa Jesu Khrist, Ka Toupa
Ka ginna mitkha in, hon mu nuam veng;
Lei vualzawlna san'g kong tel zaw,
Bang dang teng san'g kon it zaw hi,
Ka ngaihpen nang nahi.

Khamuantu kha siangthou, ka lawmhoih
Na pawlna poimoh ing, hunteng in;
Ka kha nang ngai in dangtak hi,
Damna tuihing hon donsak in;
Damna tuihing lui nahi.

Bridge:
Tuk leh Khal, Sun leh Zan
Nisim naisim;
Sum leh Pai, hauhsakna
Minthan nate
Man na bei nang lou in

Copyright: David Neihguk

Ka Gingta

January 26, 2010 ni zingkal in Pathian in Abraham hinkhua Genesis 15:6 tungtawn in hiai anuai a lagelh hon pia hi.

Genesis 15:6 "Huan, aman(Abraham) Toupa a ginga, huchiin, amah huai a diktatnain a sehsakta hi." Paite e-Holy Bible

1.Ka gingta hi, Jesu Khrist
Pathian Belamnou siangthou
Hotdamna, tangtawn hinna
Jesu Khrist sisan apan.

2.Kong kipia hi, Jesu Khrist
Na deihbang a hing dingin
Na thupiak te kazui dia
Nungzui muanhuai kahi di.

3.Kong pahtawi hi, Jesu Khrist
Kong bia hi, nang kia kon bia
Ka damsung hun leh niteng in
Nang phatna dai ngeilou ding.

English Version

It was a beautiful morning on January 26 2010, the Lord spoke to me through the life of Abraham and gave me few lines which i love to sing over and over again.

Genesis 15:6 "And he(Abraham) believed in the LORD; and he counted it to him for righteousness." (KJV)

I believe

1.I believe in Jesus Christ
Lamb of God, The Holy One
Salvation and eternal life
Through the blood of Jesus Christ

2.I offer my life to You Lord
I will live as You want me to
I will obey all Your commandments
I will be faithful to You

3.I ascribe glory to You Lord
I worship, worship You alone
All my life, till this life is over
I will never stop praising Your name.

Copyright David Neihguk

Ka Zan Mang In

"The future belongs to those who believe in the beauty of their dreams." Eleanor Roosevelt

Kuapeuh in mang inei chiat ua, mangsia-mangnuam,sunmang-zanmang chihte ahun leh mun zil in, ei deihtelna khenlam pek, koilam akipan hong kipan hiam chih theihbut louh, mang ineih zel ten' mihing bukim ihihlam alangsak hi.

January 25, 2010 zinglam dak 1:30 in ihmu louin Zan Mang kana man hi.

Ka Zan Mang in Aung San Suu Kyi makaih National League for Democracy party in Burma ah vaihawmna ahon len a,Burma tuh Democracy a kivaipuak gam ahong suakta hi.

Ka Zan Mang mah in Zogam(Manipur-India) ah pawlpi tuamtuam ten' bandh leh kiphinna chi tuamtuam aneih mun luat ziak un, minautang nek leh tak zong tawm te ading in haksatna lianpi petmah atun hi.Lekha sim Skul naupangten leng haksatna simsenglouh atuak uhi.

Burma government hoih ta ahih man in mi tampite lekha sim di bang, ahihkeileh nasem di bang in Burma ah akuan khia uhi.India khopite a tuitum lou kisakna ziak in mi tampi ten India khopite sang in Burma khopite a mitsuan zawta uhi.

Buaina leh haksatnate dou zohlouh sapna aw nem, Tunnu Zogam sapna aw in khentuam neilou in siamsin momnou tamtakte a zelsuak hi. Hiai in gamleh nam itna athaksak mahmah hi. Siamsin ten' Tunnu Zogam zuun dingin gam vangla apat, a pilna leh siamna te uh toh Zogam puahpha dingin innlam hon zuan siausiau uhi.

Hiai tengteng Maimit sinlouh Zan Mang lel hi!

Diktatna in nam a tawisang

Ka thugelh te saptuam leh pawlpi deihlouh man a gelh ahi kei ua, Saptuam leh pawlpi min zang a mimal hamphatna di zong te mohpaihna ahi zaw.

Ka saptuam ka ngaina a, ka pawlpi leng ka it hi. Himahleh diklou tak leh zuau toh pang kawm a phuhkhiak din' ka saptuam leh pawlpi ka phal kei a, ka saptuam leh ka pawlpi ahihziak kia in ka mawk pawng gup teitei sam kei hi.

Thil omdan a bul-bal theilou hileng nou bangbang in ka saptuam leh pawlpi chuh ka tang gup dia, ZCFC gum hi a katheihte zeldim thubawl in heutu hih ut ziak bang, dinmun taan khak di lauh ziak bang in ka ngoh kha tham ding hi.

A gal a et in, tua thil tung lellel pen hun paisa a ZCF in ana tuahsek mah hong om, ahi di mah in nakoih maithei. Himahleh Chennai Zomiten' ka thiltuah uh a tuam mahmah hi. Akipatna zuau ahi a, atawpna leng zuau mah ahi."Zuau gintak huai dia thutak toh kihel, gintak dia lah a lauh huai mahmah zuau."

Ken ZCFC ah hihna bangmah kanei kei a, himahleh ZCFC in Chennai Zomite adin' dinmun poimohtak anei chih kathei kichian.

Ka thugelhte apat bangmah hamphatna kakinem kei hial. Gensiatna leh muhdahna ka tuahte leh ka tuah zel lai dingte leng ka thupi "diktatna in nam a tawisang" chih puanzak na dia aman kapiak dan in ka pom.

Healthy things grow

Healthy things grow.
Growing things change.
Changing things challenge us.
Challenges make us trust in God.
Trust leads to obedience.
Obedience leads to health.
Healthy things grow.

---By Rick Warren-Saddleback Valley Community Church

Hinkhua a thil poimoh pen

“Jesun a kiangah (Thomas), Keimah tuh lampi leh thutak leh hinna ka hi; keimah a pai lou kuamah Pa kiang a tung ngei kei.” Johan 14:6


“Hiai khovel tuipi tung a longpi tumdek toh ka tehkak hi. Longpi tuilaka atumdek chiang in, a tumlouh na dia panlak a poimohpen ahikei, huaisangin longpi apat kihepkhiak thil poimohpen ahi zaw. Hiai longpi tuahsia a tuangten’ a damna ding un hotkhiakna long (life-boat) akiphamoh uhi." Evangelist C.V.Samuel.

Huchimah bang in, Jesu Khrist, hotkhiakna long (life-boat) ahi a, Amah kia in longkhawlna gamnuam, khovel lungkhamnate sukbuailouhna, lungzin-mangbat omnawnlouhna gam ah hon pi kai thei hi.

La phuaktu in “Simlei ah zaw khualzin kahi, ka khualzin na abei chiang in” chiin tangtawn gam ngaihla ana awih hi. Ei deihtelna tel louin nikhat ni chiangin hiai leitung hinkhua hong bei ding a, huai hun chiangin tung sun mangin ahon tum mang santa ding hi.

Prepaid SIM Card khenkhat ah niteng in daily rental Rs 1 aki cut geihgeih hi. Hiaitoh kizawitawn in niteng in I dam kum leng nikhat jel in akiam geihgeih hi. I khualzinna longpi (sapum) chuh awlawl in nichin in a tum jel. Kum tam deuhdeuh toh naupan deuhdeuh thuah chih a omngei kei bang in, upat deuhdeuh leh kum tawm deuhdeuh chih leng a om tuan sam kei hi. Huaiziak in I khualzinna longpi chuh khaamvual louh in a tum jom jeljel hi.

Longpi tuahsia a tuangten hotkhiakna long (life-boat) a poimoh bang un, ei mihing sihna limguam tawn lellel ten leng hotkhiakna long I kiphamoh chiat uh hi. Hiai hotkhiakna long, Tuipi bang a lian Saptuam a mi nahih manin na tangkha teitei ding chihna a omkei a, na hihlouhman in leng na tang khakei ding chihna hi sese tuanlou hi.

Hiai hotkhiakna long Jesu Khrist kiang kia ah a om. Longpi tuahsia a tuang khaten hotkhiakna long (life-boat) a poimoh sang un leng ei sihna hanmual zuan mihingten Jesu Khrist I poimoh zaw tham uhi!

Hiai ahi hinkhua a poimoh pen. Bangdang hikei e!

Hilhchetna

"Thutak gen mukte omden a, zuau gen lei in bel tomchik lel daih hi." Paunakte 12:19

A patna ding in, hiai laigelh heutu hih ut man leh mi soisel utna ziak a gelh ahi kei(ka laigelhte ziak a heutu hih ut hon sa khawng ana om ziak a hong kigen fel masa kahi), diktatna tawisang ut leh thutak gum mi kahihman a hon gelh kahi zaw.

Diktatna tawisang leh thutak gum mi nahih leh ka thugelhte natheisiam ding.

Chennai a EBC phuhkhiak sawm om ahihlam kana theikha kei. EBC Bangalore (EBCB) Pastor pan hong vehna a athugen khenkhat te ah Bangalore a ZCF leh EBC om ahihdan khawng agen kha hi, himahleh kei mimawl in, hiai a thugen na te apat a hidden agenda EBC phuhkhiak sawm ahihlam kana theisuah kei hi. Kei ana theih in phat tuamna anei tuan kei nadia, himahleh EBC member khat kahihna ah EBC toh kisai bel kathei ut sam hi.

Hun hong pai zel in, nikhat ka mobile ah sms tungtawn in EBCB Pastor pa hong hoh dek chih kana mu hi, ka ngaihtuahna ah ZCF kikhopna a Pathian thu gen dia hong hoh hi inteh chi in kana kipak mahmah hi. Hiai sms tungtawn mah in ZCF chairman pa inn a hoh chiat di chih chialna kana mu hi. Himahleh, huai ni a buaina dang kana neih ziak in ka hoh man kei hi.

Pathian ni hong tung a ZCF kikhopna a EBCB Pastor pan thu hong gendi kasak leh muh khak in a om kei hi. Anung sawt sim in Chennai a EBC phuhkhiak ahi chih kana theipan a, hiai in ka ngaihsutna ah huai ni a Pastor pa saptuam phut khe dia hong kuan hidi ahi chih gintakna hon pia a, ka kan sui leh ana dik nawn zezen hi! Huaini a vahoh kha khenkhat ten' ZCF chairman pa in a tun tak un EBC kiphut khe dek ahi chih athei pan uh!

Ka lungsim in ah vaal kisakna toh saptuam phuhkhiak le guk hihna uh e kachi sim hi (Heutu hihna leh abang hiam kinem kahi zenzen kei a, himahleh ka saptuam EBC ki phuh khiak na ah chuh kitel tak a theihsak a ka om kakinem, ana kinem sang law kha ka diam!) Hiaithu hong kithang ta ahihman in kenle ZCF kikhopna a lah EBC te kitampen ahih chiang in I Zomi pih ten theisiam kei kha unteh chi in EBC kiphuh khiak thu ZCF kikhopna a mipite theihdia puankhiak kilawm kasak dan heutute kiangah ka gen a, himahleh tuni tan puan in a om nai kei.

Lamdang takin EBC Chennai akiphuhkhiak thu Khristian thukizakna leh Local newspaper te ah puan in hong om a, himahleh amunpi ah bel EBC saptuam ana hi ngoihngoih, himahleh EBC kiphuhkhiak lam thei khalou om ding in ka gingta lai hi. Hiai bang ziak ahia chih kathei kei a, kei buaipih di le ahikei.

ZCF chairman hil hial in ama hun sung a mipite deihtelna tel lou a pawlpi dang hon phuh khiak poi kasa. Kilawm lah deuh hiveh aw maw guai!

Hiai teng a bei di kasak leh Lamka Post January 15 2010 issue ah Chennai a Paite mi 1000 val om chih ka hon mu nawn a, hiai zuauthu paisuak kei heh chih deihna ziakin in Zogam.com ah Chennai a Paite mi 1000 ka phaklouh dan uh comment kon pe khong hi.

Thukhitna: Tulaitak a i buaipih uh Chennai a Zomite buaina pen mi pawlkhat ten pak (flower) a muum nailou pi a paak sak sawm ziak uh ahi. Ngaklah law lou in, huai pak pen i hih theih khamkham in tui pe chiatle a hun hong tun chiang in hong muum dia etlawm tak in hong paak ding hi.


*** Thudik ka gum a, bangmah dang ka buaipih kei.

Ka saptuam EBC

Ka neu apat EBC saptuam a khangkhia kahih man in kaki nei sak mahmah hi, Khalam ah vualzawlna tampi EBC saptuam tungtawn in kana tang hi. Hiai te tengteng Pathian hoihna ziak ahi chih kathei a, Pathian tung leh EBC saptuam tung ah ka kipak petmah hi.

Ka innkuan khang thu uah Pathian in a hehpihna ziak in EBC saptuam adin honna zang toutou hi. Tangtawn gam nuam honna zot santa ka pu, kei a ding a ka tap pa Luaipum ahi a, Amah Aibulawm Convention saptuam a dia founding member ana hih ban ah upa ordained leng ana hi. Huchi mah bang in ka pa ngei leng Saptuam upa a pang in ginom tak in EBC saptuam ading in ana kizang tou hi.

Hichibang teng a ka innkuan ua Pathian na EBC saptuam tungtawn a kana sepna uah kenle EBC saptuam ngaihnatna lianpi kanei hi. I theihchiatsa mah bang un EBC saptuam kibulphuhna hoihtak nei saptuam ahi a, Pathian kihta mi ginom tampi te kuhkal na ziak leh Pathian zahngaihna ziak kia a hiai tan tung ahi chih ka thei kichian.

Ka neu lai in EBC kana hi a, tu dong in le ka hi lai a, hun hong pai zel ding ah leng ka hi jellai ding.

Himahleh kei EBC saptuam ahihleh a guk a gal a phuhkhiak saptuam ahi kei a, mipite theihpihna toh phuhkhiak saptuam ahi zaw. Kei EBC saptuam ahihleh mipite deihna a phuhkhiak saptuam ahi a, mi khenkhat te angmasial na mai a phuhkhiak saptuam ahi kei. Kei saptuam, EBC founder member te zahmoh leh kampau kilawmlou zangte ahi kei ua, hinkhua siangthou, mipite etton tak dia hing leh Pathian kihta te ahi uh. Kei EBC saptuam makaite zuau toh pang a vaihawnte ahi kei ua, diktatna toh vaihawm te ahi zaw uh. Kei EBC saptuam makaite amau hamphatna di kia zong a vial dian te ahi kei ua, Pathian leh mipite a dia nasem te ahi zaw uh. Kei saptuam, EBC makaite mimal hamphat na di zong lou a Pathian adia a neih tengteng uh toh nasem te ahi uh. Kei EBC pastor ten' EBC te lak kia ah Pathian thu a gen kei ua, Pathian thu a gen na peuh uh EBC a suah sak sawm teitei tuan kei uh. Kei EBC pastor ten' tup guk nei in saptuam dang a veh ngei kei ua, a thiltup te uh saptuam dangte toh pangkhawm in a sem khawm zaw uh.

Hiai ahi ka saptuam EBC.

The journey for Zo brotherhood will not be hampered by the people who uses ill-willed and selfish ideologies of communalism to promote division.

Hichi zaw deuh leh chih na gam ah!

Hichi zaw deuh leh chih na gam ah!

Ni danglai in I Pu – Pa ten’ sa amat chiang ua “Sa manpa leh amul manpa a kilawm” ana chih bang un thil himhim akilawmdan leh apaidan chih a om hi. Singtang khota a thuthak poimoh a om chiang in Tangkou pa’n mipi zak din a puangzak zel hi. Singdang khopi a om ei Zomiten leng thuthak poimoh a om chiang in I Biakinn hiam ZoZaam ahihkeileh ZoZaam Thupuak tungtawn in mipite iki zasak zel uhi. Thuhoih hi in thuhoihlou hitaleh mipite iki hilh dialdial chiang in anuam mahmah hi. A lehlam ah thil I iim bawla I guk hih chiang in kitheihsiam louhna leh kimuan louhna piangsak hi.

A tom a gen in hiai thu gelh kaki lawp dek suai kei hi! Himahleh hiai thiltung apan zillai hoihtak tamlou zil di om hi a katheih man in ka hon gelh suk mai hi.
Zomi Christian Fellowship Chennai (ZCFC) kipolh lim na maimai dia om ahikei a, Pathian be ut leh ngaina te kipolh khawmna Saptuam ahi. Lungsim taktak toh Pathian zong mite a ding in ZCFC in chitlouhna bangmah anei kei.

Evangelical Baptist Convention (EBC) naupang huai deuh mai a phuh khiak a om a, tunitan Chennai khopi sung a Zomite theihdia puan a omlou a, innlam a puan a om thildik hi in kathei kei. EBC kiphuhkhiak hoih kasa a, a founding member te pahtak huai le kasa. Himahleh, thil ihih chiang in pilvang deuh in hih thei le, aziak chuh ZCFC I chih chiang in EBC te kia kikhopna ahi kei a, huaiziak in saptuam dang leh paudang zang te a di le khual huai kasa mahmah hi. Ei a dia thil hou chik mi khenkhatte a dia khasiat huai pi ana hikha thei hi.

Tulel a ZCFC in I hih di ua mamoh thil te:

1. Pastor: ZCFC in Pastor piching deuh khat ina neih khak louh ziak un saptuam dangten hong sawksawk di uh abang. Hiai ka chihna in ZCFC apat saptuam dang aki phuh khiak ding dal hilou in, huchi bang dinmun a hong om hial a leh leng bangmah buaina omlou a official tak leh kituaktak a thil apai theih na ding deihna ahi zaw. ZCFC Pathian deihdan tak leh lamzang taka apai theih nading in Full time Pastor neih poimoh mahmah hi. Pathian muang kawm in kisa himhim le ki vaak zou thou ding in um ing.

2. Doctrine leh Bylaw: ZCFC milip mi kitam pianta ahihman in Pastor toh pang a Doctrine leh daan te chiang tak a gelhthoh a neih hunta ahi.

3. Missions: I hih theih khamkham ua Missionary nasepna a ikihel ding uh ahi. Etsakna ding in Missionary khat beek I vak thei uh hi.

4. Bial kikhopna: Veng chih ah bial kikhopna omleh mipite ading in phatuam mahmah ding hi. Hiai tengteng a ding in Pastor poimoh mahmah hi.

Note : EBC dal kahi zenzen kei a, aki phuh khiak dan kilawm zou chiah lou kasak ziak a kon kup maimai ahi.

Khau sau aki kai awk nak!

Khau sau aki kai awk nak!

“Huchiin, kituahna ding leh, kihihhat tuahna ding thilte i delh ding uh.” Romete 14:19


Zomi Christian Fellowship, Chennai khangthu sut din a theipen leh a chingpen kahi kei hial. Kei sanga theizaw leh gelhsiam zaw mi tampi om hinapi in kei a theilou pen in phat tuam ngaihna toh tamlou kahon gelh hi.

I saptuam uh ZCF pen tukum toh kum 6 achin na ding hipan lel hi. I naupan uh toh teh in Pathian’ vualzawlna nakpi tak in I dong ua, mit a muh theih hial in ma I sawn uhi. Niteng phial a Zodawn (India, Burma leh Bangladesh) apat Chennai khopi a siam sin ding leh nek leh tak zong dia hong kuan Zomi tampite lametna, kinepna leh kingakna ZCF ahi. Hichibang dinmun poimohtak nei khalam leh salam a vualzawlna nak ZCF humbit tu, puahpha tu leh phungvuh tu ding kuadang hilou in nang leh kei ihi.

Mi zah pha ikisak louh lai nangawn ua honna taisan ngei loua honna domsang gige tu, tua hithei zaw deuh ikisak hun in taisan kei hial ni. I Bible chang teel in a gen mah bang in I kibatnate uh I mitsuan ding uh, I kibatlouhna te uh hizaw lou in. “Gingtu hihna zar in Toupa khat, ginna khat leh baptisma khat I kikop uhi. I hotdamna uh leng akibang a, I hinkhua uh leh I tunung hun ding uh leng akibang lailai hi, hiaite mah ikibatlouhna te sanga I gengen zawk ding uh ahi.” (Thiltup in a pii hinkhua, Rick Warren.)

I saptuam uh I et chiangin I phu lou uh neih leh lam vanzat kia hilouin lam tuamtuam ah Pathian’deihsakna I tang mahmah uhi. Thupil in “Khau leng a hong sau deuh deuh leh aki kai awk” achih bang deuh in ei leng I tam deuh deuh uh leh kikai awk kha ihi diam chih theih in a om hi. Khau sau pen khaulim a akizial hiam ahih keileh aki zatna ding bangbang a aki zat chiang in aki kai awk thei kei hi.

Laphuaktu khat in vualzawlna na don te sim in ana chi a, tuni in I saptuam ua vualzawlna I donte uh sim in khau zang toh teh le saupi petmah a pha ding hi. Hiai khau zangte azat na dia kilawm, etsakna din, thil gak kip nadi bang, silh leh ten phan nadi bang, guam kuak a kia mi kaih khiak nadi bang in I zang kha uh hiam? Hiai vualzawlna khau zangte a zat nadi bang tak a zat ahihkeileh akikai awk ngei ngei ding hi.

Khau kikai awk laklak ah nylon khau a phel hak pen hi. A kikai awk khau pen nakpi tak a aki kang tuah ma a I sut leh a phel a nuam hi. Hiai khau kikai awk pen midang in a phel sang in khau khoih mun mi mah in a sut siam zaw hi.




Matthai 10:8b ah Jesu’n “a thawnin na mu ua, a thawnin pia un.” achi hi. Tui luang lou a sawt a vun leh a gim siat jel bang in, vualzawlna I ngahte I pai sawn sak kei leh ei a din gimsiatna hontun dia, I tuah louh ding pi uh buaina leh lungkhamna in hon bawm ding hi. Huaiziak in ei leh ei ki tuisa buak kei hial ni.

Saptuam khat peuh kiang a thupiak lian pen tuh hiai ahi. “Huaijiak in, kuan unla, nam chih a pan nungjuite bawl unla, Pa leh Tapa leh Kha Siangthou min in baptis unla, thu kon piak tengteng pom ding in thuhilh un. Huan, ngai un, kei khantawn in, khovel tawp pha in leng, na kiang uah ka om jel ding, a chi hi. Matthai 28:19-20” Pathian’ Lal gam lakna ah bangzah in iki hel kha ua. Tangthupha genna ding in mimal hi in I pawlpi uh hitaleh hun bangzah leh sum leh pai bangzah I bikhiah ua? Missionary bangzah I chawm ua? Kha mangthang vei saptuam leh mimal ihi hia?

I lak ua thil tung teng teng muh theih hi in muh theihlouh hi leh Pathian’ apat ahi a, bangkim ah Amah muang le Aman’ I paina ding lampi te hon hilh ding hi. “Na lampite tengteng ah amah thei inla, huan aman na lampite a pitang ding hi. Paunakte 3:6.


Pathian puaknat te paw na in, Pathian lungtang kitam sak ten’ ei lungtang leng hon kitamsak henla, I tup leh ngim ten’ Pathian gam nasepna ah vanpi khawng leh tua I buai pihpih uh thil neu chikchik te hong veng mai ding hi. Setan in hon khenzak sawm lai in eiten’ I vualzawlna khau hual te apat leen (net) te phan in a mangthang lellel mihing te man kawm in setan nasepna hen chimit ni.

Lamdang kasak thudik te

Lamdang kasak thudik ka theihsiam khol louhte

1.India khopi Mumbai chihlouh a Zomi Christian Fellowship (ZCF) kana et vengveng chiang in refugee camp mah bang kasa! A tam masasa kihuai tuam in pawl dang phut khe zeih...a tawp a a tawmpen ten tan bawl mawk!

Zomi Christian Fellowship Chennai te kianga Laikhak - 1

Zomi Christian Fellowship Chennai te kianga Laikhak - 1

Kei, Pathian’ Sawltak lai khaktu in I Toupa Jesu Khrist min in Advent Christmas chibai kon buk masa hi. Sun leh Jan in ka thumna ah kon na thumpih gige hi.
Kipahthu genna

Pathian’ gam nasepna a pan na laknate uh leh ginna a na chihtak nate uh ziak in Pathian min ka phat masa hi. Na lak uah mi tampite mun gamla pipi apan na sum neih sunsunte uh mah seng a Pathian’ Biakbuk hon naih nahi uh chih katheih ziakin leng Pathian min ka phat ahi.

Nam dangte toh kikhopkhawmna na neihte uh thilhoih ahi, gingloumi nahon tonpih jel uh leng Pathian gamnasepna chikhat ahi. Tunai zek a Advent Khristmas lopna ah leng tha leh jung, sum leh pai, ngaihtuahna leh hun tampi na seng uh chih katheihman in Pathian’ min kaphat ahi.

Khrist a zalenna

Pathian in mihingte zalenna hon pia a, Amah gintaak utlouhna lungsim tanpha neih hon phalsak hi. Amah diktatna ziak mah in kuapeuh Amah zui utlou mi tuh aki zui sak teitei kei hial hi. “Jesu Khrist nithum ni a haan apat a thohnawn in Amah gingtasa leh theisa te kiang kia ah ava kilak hi.” (Philip Yancey).

Pathian in noplenna leng hon pia a, I hih ding leh hih louh dingte akoi – atang, aneen -aham in hon thuneih khum kei hi. Thilhoih leh hoihlou deihtelna leng hon pia hi. Hiai in thil chiin tuamtuam te : duh zawng, etnop zawng, ngaihnop zawng te ei deihtelna tungtawn in thuneihna hon pia hi.

ZCF saptuam sung kana etet chiang in, kikhopna lam ah na taima ua, himahleh kikhop chiangin Bible tawi na tam hetkei mawk uhi. Kikhop chianga Bible tawi ding ngaihsak himhim lou pawlkhat na om ua, khenkhat ten lah na tawi ut hang un na manghilh veu sek uhi. Himahleh, Za bung, Raja bung, Khaini bung te puakding bel na manghilh thei hetkei thepthup jel uhi.

Hiai tungtang ah naki siamtan uh ahi maithei, Bible in hichi bang thilchiin phal ahi nachi maithei uh. “Thil hoihlou hih aki siamtan nuamte ading tanpha in Pathian in a pansan ding uh Bible chang leng a pia hi.”(Philip Yancey). Hiaichiah ahi Pathian in zalenna hon piak. Himahleh Pathian in “Na nekun zong, na dawnun zong, ahih kei leh, bangpeuh na hih chiangun, bangkim Pathian thupi nadingin hih un.” – 1 Korinthte 10:31 achi jel hi. Huchi ahihleh, na Za tepte uh, na Dum muam muamte uh leh thil dangdang na hihte un Pathian a tawisang dia? Nou taksa mahmah ading inle thilhoih hon tun dia?

Chennai Zomi ten’ hiai atung a thilchiin hoihloute ziakin haksatna tampitak natuak uh chih kathei. Zomi Nam Ni, Freshers meet leh Khristmas zat ding chiang a na buaipih pen uh hiai atung a na thil chiin hoihlou te uh ahi. Namdangte’ hon theih di lah nalau ua, huai ziak in thil na hih khempeuh uah na lungsim uh hon kam khat a om gige hi, adiak in na makaite uh ading in.

Thu kana zakdan in, hong tungding kumlui khak ni zaan bangleng innlam a na hihsek bang un zankim lai a Biakinn a kikhopna neih na lung gulh mahmah uhi. Himahleh, hiai hunin mi khat leh nih omdan hoihlouh ziakin na “Keel luphum(Thilchiin hoihloute)” uh Biakinn thunei ten’ thei le uh Biakinn tanpha hon zangsak nawnlou thei ahih manun huai hunah kikhopna neihlouh hoih nasa zaw uhi.

Na deihthoh leh na khiaklah mahmah uh Talab, Raja, Khaini, Za tep leh Zu te na pianpih uh ahikei a, hiaite nava hihkhak ziak unle kahon mohsa pumlum kei hi. Pathian in zalenna hon piak na zatkhelh khak ziak uh ahizaw. Keileng hiai thilchiin hoihloute ziakin kana puk ngei hi, himahleh tu in ka suakta ta. Khelhna tuh kisikna in azuih ding ahi, hiai in na khalam hinkhua uah pichin na hon tun ding hi.

Na tawpsan leh tawpsan louh ding uh zaw nou sia leh pha theihna a kinga ahi. Na tawpsan ut kei teitei uh leh Pathian in ahon Phut Luih kei hial ding a, kingai niam a na tawpsan ut uh leh bel Aman thahatna hon pia zaw dia, na tawpsan zou law mahmah ding uhi.

Toupa Jesu Khrist’ Hehpihna in noute hon ompih hen.
Lai Khak
Pathian’ Sawltak

Khristmas ni ahong tun chian……

Khristmas ni ahong tun chian……

Simtute Khristmas Chibai

Tungnungpen ah Pathian thupi henla, leitunga a kipahpih mahmah mihingte lakah lemthu leng hen, a chi uhi. (Luka 2:14)

Khua hong vot sim ta, mei bang hong kai thei pian ta, pangkhang lam a meiphu awi kawm a ”Bethlehem ngaihna tulsa lungsung ah hong thak nawn” chih la ngaikawm a tut hial na din Chennai a vot khol kei. Phalbi nupi ten’ le omna tak sa di un ka gingta kei hi. Himahleh, tutung Chennai a Khristmas zat di chuh a nopna riau khat om din ka gingta hi.

Ka theihphak tan in Khristmas 10 vei sang a tawm zawlou kana zang khin ta hi. Nam dang te lak ah leng kana zang kha sam hi, himahleh ei Zomite’ Khristmas zatdan kan a nuamkasak bel a omkei hi. I Khristmas la te mahmah uh leng ahoih a, asak anuam hi, khuangpute leng a siam ua, lengkhop anuam thei mahmah hi, tuanvaite leng a siam ua, meh leh buh alim thei mahmah hi, a tom a gen in nopna ngen in a pumdim hi. Khristmas lopdan i nehsoh mahmah ta uh chih ding ahi dia Khristmas nuam leh nuam lou bang I omsak (se) uhi.

Tutung Khristmas bangle nuam di hia nuam lou di hia chih kuapeuh bildoh khat ahi. Ei ut dan te bel sun nitum a lop di, nitaklam chia deel jen a sa nek a, huai khit chia janhak jen a lenkhop di chih khawng ahi. Sa nek, lenkhop, Sa nek, lenkhop - khek leh zawmah lai, nuam law ngut ding mah ahi. Hiai teng hun sa lou in, khenkhat ten’ Zu bang I hon chi tei sam uhi. Zu kham bang I hong om ua, lemthu a leng in alengmang vovouh ta hi. Hiailam thu hiaizah hiphot henla.

Kum 2000 paita in Bethlehem Bawng inn ah Jesu Khrist ana piang hi, tuhun in Bethlehem ah hong piang nawn kei ding a, huai sang in a hampha nang leh kei’ lungsung ah hong piang ta ding hi. Huai ding in 5 star hotel bang a nuam, Zo - Sahei paak bang a etlawm lugsung apoimoh kei a, poimoh ana hitazenleh nang leh ken I nei zoukei hial ding uhi! Huaisangin Bawng inn banga nuamlou, gimsia leh a tamkham lungsung ah hong piang nuam hizaw hi, Amen. Tuni in I lungsung Bawng inn chiat uah Naungek Jesu hong pian na ding mun a awng hiam?

Khristmas thilpiak diktak silh leh ten leh van mantam te ahi kei a, Jesu Khrist tungtawn a Pathian toh kilemna ahi. Kuamah dang in hon piak theihlouh Pathian toh kilemna a nei mite Khristmas hamphat pihte ahi uh. Hiai Pathian toh kilemna in khat leh khat kilem in hon om sak a, huai tuh mihingte lakah lemthu lenghen chih omzia diktak ahi.

I leh kik nawn zual dia, Zu leh Sa toh Khristmas lop a Pathian toh kilemna, khat leh khat kilemna leh I mihin pihte toh kilmena hon tun di ahihleh dawn tham ni, ne tham ni. Khovel pilna a sang mahmah ta na a, Zu leh Khamtheih chi tuamtuam bawlten tuni tan in Lemna Zu leh Lemna Khamtheih a bawlkhe thei nai kei uhi, bawl leng a bawl khe thei ngei kei ding uh, huai sang in phim bil sung ah Sai pi lut leh baihlam zaw ding hi. Aziak tuh Lemna Pathian’ kiang kia ah a om a, Amah Lemna Kumpi Jesu Khrist hi ahi.

Hunpaisa Khrsitmas te mitkha a kana nung et kik chiang in, lemna sang in buaina kibehlap tam zaw hi in kamu hi. Kei mimal hinkhua mahmah leng ka nung et kik chiang in, huai kum Khristmas in ka melma pa toh kana kilem uh chia gen di ka nei het kei hi. Ahi a lah “a kipahpih mahmah mihingte lakah lemthu leng hen” chih ahi a, akipahpihna lam I et leh lah ki duai san lou, lemna lah leng si lou, achih leh bang kipahpih ihi mahmah di uh. Neulai in Khristmas chiang in Bawng zunbu khawng I kipahpih pen ana hi maithei hi. Khaile, mimal in ki ngaihtuah chiat ni, Khristmas hun in bang ahia iki pahpih penpen uh.

Naungek ihih lai in Khristmas omzia I thei kei a, ahoihna khat a om vet lehlam. I hong khang lian a Khristmas chiang a I kipahpih te mut puak, gold finger, vanthak leh nek leh dawn chih khawng ahi. I hong piching a, Khristmas lopdan chi tuamtuam, mun tuamtuam, mi tuamtuam toh I neih zengzung ziak un I pum buai hithet ua, a bang pentak ahia I kipahpih chih leng I ngaihtuah man kei uh abang. Kipahna sang in nopbawlna I uang bawl ua, lemna sang in buaina a piang a, Khristmas I lop mun deuhdeuh leh mangthang deuhdeuh ding I bang uhi. Hiai lampang gen lou di kachih chiang in kana gelh kha veu sek hi, ngaihsiam.

Khristmas ni ahong tun chian…amasapen in Pathian toh mimal in lemna bawl thak ni. Pathian toh iki lem khit chiang in I mihinpih dangte toh leng lemna bawl ni. Lemna lam a fel chiang in akipahpihna lam hihenla, hiai ah a kham om sese dah henla, a om sunsun te le Lemna Zu, Lemna Khamtheih kham te hile uh.

Khristmas ni ahong tun chian…ei hon siamtu Pathian toh lemna bawl hun in zang theileng Mautaam kum a Khristmas toh adangte anopdan kikhe law vevok lou din ka ngaihsun hi.

Simtute Toupan na vek un hon vualzawl chiat ta hen
Amen

Kipumkhekna

Kipumkhekna

“Tulai leitung nuntak zia bangin nungta nawn kei unla, Pathian’ deihlam bukim, a hoih leh Ama’ lungtaina bang hi hiam, chih entela, pha na sakpih theih nadingun, na lungsim uh thaksakna pansana, mi kipumkhek suakta un.” Romete 12:2

“Hiai khovel dan bangin om kei unla; Pathian deihlam a hoih leh, lungtuah huai tak leh, hoihkim, na theihtel theihna ding un, na lungsim uh a thaka omin hong lamdang zota un.” Romete 12:2

Kikhek zek, neng chik kikhek, kikhek cheuh, a kimkhat kikhek, kiphel khek, chih ahi kei a “Kipumkhek” chih ahi. Lamdang sim, lamdang lou sim, lamdang khol thou chih leng ahi tuan kei a “Lamdang” chih ahi tlats. “Lum la lum lou, vot lah vot lou a, na om pelhpulh jiakin, ka kam akipanin kon se khe ding.” Kilakna 3:16


A neu a lian, a tek a khang in ikipahpih mahmah uh tuh thil “thak” ahi. Huchimah bang in Kumthak tuh gentam ngai lou in kuapeuh in iki pahpih chiat chih I thei uhi. Thil thak I chih chiang in thil lui pen a thak hong suak chihna hikim khol kei mahleh Kumthak I chih chiang in Kumlui beita chihna ahi. Huaiziak in a beita Kumlui pen I kha ua, ahong tung Kumthak pen kipahpih in I lawm uhi.

Thil thak lak a manpha penpen tuh Inn thak, Car thak, Kumthak chihte ahi masa kei ua, lungsim thak ahi. Pathian deihlam bukim theihtel theihna omsun tuh lungsim thak ahi (Romete 12:2).

Mihing te ading in salam ah pichin na kum tam thu a neih ahi a, himahleh khalam a pichinna pen kumtam thu a neih ahi kei. Kum a hong thak nawn a, michih in I khalam hinkhua bang chi dinmun in a om chih ngaihtuah huai kasa mahmah hi.

Tu Kumthak kipah huai ah, tup leh ngim hoih taktak I neih chiat uh ka gingta. Huai te lak ah a poimoh mahmah Bible sim a thumna neih, Biakinn kai gige chihte bang tup a nei ihi maithei. Hiaite hi mihing thahatna kia a sepsuah theih ahi kei uh. Bible sim utna, kikhop utna lungsim chihte ei ut thu a vaneih mawk theih thil ahi kei. Lungsim tawng lampek apat a hon phutu khat a om ngai ahi hiai tuh kha siangthou nasepna ahi.

Thupukna hoih pipi te toh kum 2010 I pat lai in hiai anuai a te I lungsim uah tham den hen:

Hotdamna / Pianthakna: Pianthakna kichian nei nailoute adingin tu hun manpha ahi. Piangthaksa ten’ “lau leh ling kawmin I hotdamna chiat uh sem khia ni” Filipite 2:12b. Sawt law nailou in Mizo Idol Malsawmtluangi tuh Mizo Idol ahihna lak khiak sak in a om chih news ah I mu. Pathian in zaw I hotdamna a hon laksak hial kei dia himahleh Piangthak ihih ziak a I hih dia kilawmte ihih louh a, I hih dia kilawm loute I hih leh I Pianthakna in gen a nei kei ding hi.

Kipumkhekna: Vatawt piang tung in tui a naih pah bang in ei mihing ten le I pian chil apat khelhna I na pai khin uhi. Hiai khelhna taisan a Pathian deihlam hih na ding in kikhekna thupi tak a hong tun ngai hi. Singkung hoih leh hoih lou a gah a akitheih mah bang in, kikhekna diktak tuh Siangthouna leh Pathian it zawk semna in a zui naknak hi. Hiaite ahi Pathian lam a kikhekna diktak “kipumkhekna”. “Huchih ahih jiakin, kuapeuh Krisa a om leh, thilsiam thak a honghi a; thil luite a mangta a; ngai un, a hongthakta uhi.” II Korinth-te 5:17

Second coming: Jesu Khrist hong pai nawn ngeingei dinga, a hun ding bel Pa Pathian kia in athei. Hing leh dam in Jesu hong pai nawn I tuak maithei ahihkeileh sihna hanmual I na liam khinta maithei. Bangteng ahi zong in Jesu vaihawmna mai ah khat vei chiang in I ding ngei ding. Huai ding in na kiman hiam?

Lungsim thak toh Pathian deih lam hih a, Kris Jesu thil hihtheihna tungtawn a kipumkhek gingtu muanhuai hithei chiat ding in Pathian in I khalam mit te uh hon vaksak chiat ta hen. Amen