Hinkhua a thil poimoh pen

“Jesun a kiangah (Thomas), Keimah tuh lampi leh thutak leh hinna ka hi; keimah a pai lou kuamah Pa kiang a tung ngei kei.” Johan 14:6


“Hiai khovel tuipi tung a longpi tumdek toh ka tehkak hi. Longpi tuilaka atumdek chiang in, a tumlouh na dia panlak a poimohpen ahikei, huaisangin longpi apat kihepkhiak thil poimohpen ahi zaw. Hiai longpi tuahsia a tuangten’ a damna ding un hotkhiakna long (life-boat) akiphamoh uhi." Evangelist C.V.Samuel.

Huchimah bang in, Jesu Khrist, hotkhiakna long (life-boat) ahi a, Amah kia in longkhawlna gamnuam, khovel lungkhamnate sukbuailouhna, lungzin-mangbat omnawnlouhna gam ah hon pi kai thei hi.

La phuaktu in “Simlei ah zaw khualzin kahi, ka khualzin na abei chiang in” chiin tangtawn gam ngaihla ana awih hi. Ei deihtelna tel louin nikhat ni chiangin hiai leitung hinkhua hong bei ding a, huai hun chiangin tung sun mangin ahon tum mang santa ding hi.

Prepaid SIM Card khenkhat ah niteng in daily rental Rs 1 aki cut geihgeih hi. Hiaitoh kizawitawn in niteng in I dam kum leng nikhat jel in akiam geihgeih hi. I khualzinna longpi (sapum) chuh awlawl in nichin in a tum jel. Kum tam deuhdeuh toh naupan deuhdeuh thuah chih a omngei kei bang in, upat deuhdeuh leh kum tawm deuhdeuh chih leng a om tuan sam kei hi. Huaiziak in I khualzinna longpi chuh khaamvual louh in a tum jom jeljel hi.

Longpi tuahsia a tuangten hotkhiakna long (life-boat) a poimoh bang un, ei mihing sihna limguam tawn lellel ten leng hotkhiakna long I kiphamoh chiat uh hi. Hiai hotkhiakna long, Tuipi bang a lian Saptuam a mi nahih manin na tangkha teitei ding chihna a omkei a, na hihlouhman in leng na tang khakei ding chihna hi sese tuanlou hi.

Hiai hotkhiakna long Jesu Khrist kiang kia ah a om. Longpi tuahsia a tuang khaten hotkhiakna long (life-boat) a poimoh sang un leng ei sihna hanmual zuan mihingten Jesu Khrist I poimoh zaw tham uhi!

Hiai ahi hinkhua a poimoh pen. Bangdang hikei e!