Ki Ngeina Seh

Kua ahia ki ngeina seh theilou? Ki ngeina seh theilou kisa kua hiam om? Ki ngeina seh theilou kisakna lungsim neih ki ngeina seh theilou lailai om hia, kua?

Pupu Adam leh Pipi Evi te hunlai in, vuaktang in Eden huan sungah a khosa ua, a vuaktan na uh a zumpih hetkei uh chih Genesis 2:25 na ah kimuthei hi. Amaute puan ak silh lou di him a Pathian in a siam ahih ziak in, a om dandan uh aki ngeina seh uhi.

Naungek a pian khiak ma in a Nu sungah kual ngeungeu in a om hi. Mun kochik tak sung a om himahleh sawt om lua, kha kua tak om ahihman in aki ngeina seh a nuam asak thoh zawsop hi. Ginlah huai nasak leh naungek piangtung te ana dong mah dih!

Naungek hong khanglian a, ama deihtelna tellou in siamsinna inn ah siamsin sak in a om hi. Siamsin dia a kuan masakni in utloulua kisain kap ekek mahleh kal khat le ching man louin kithalopna in hong dim pah hi. Huai omzia tuh ahong ki ngeina seh ta chihna ahi.

Khawvel pilna sin kawmkawm in paukam hoih leh hoihlou, thilchin hoih leh hoihlou amuh leh azakte apatin ahinkhua a dia poimoh pen omdan hoih leh hoihlou khatzawsam atel ngai hi.

Hiai deihtelna ahihleh Pathian honpiak sia-le-pha theihna a kinga ahi. Deihtelna pansan a thilhoih hih dia thupukna lak pen nak hoihlua hinapi in amahvuak in abukim kei hi.

Deihtelna apoimoh zahzah in thilchin zong kiphamoh hamtang hi, ahangbel thilchin kingeinaseh te omdan hoih leh hoihlou bawltu ahihman in.

Omdan hoih neih ka thupi ahihleh, ka thilchin te ka bawl hoih masak ngai hi. Ka thilchin hoihloute ka ngeilou seh a, ahoihte kia ka ngeina seh ding ahi.