Kiging gige in

7^th September 2008

Matthai 24: 36-51

Changteel: Matthai 24:44 “Tua bang ahih manin, noute zong kimansain om un. Na lamet louh hun takun Mihing Tapa kong pai ding hi”.

Ka College uah surprise Quiz kanei sek ua, huaituh bang hi hiam ichih leh, heututen’ exam hunding hilhkhol sese lou a, a ut hunhun ua hon exam sak thei uh chihna ahi. Huaiziakin kei a student pa adi’n tuni a zillai ka zilte, zingchiang in kasim na di chi a om maimai theih hilou ahi, aziaktuh ka heutupa lungsim ka theih louh ziakin. Huaiziakin kei a dia ahoih pen chu, ginom leh taima taka ka zillai te niteng a kasim gige ding ahi. Huai tuh chiklaipeuh a exam dia kiging gige a kana omna himai ahi. A lehlamah, hiai thei napi a ana kiging khol lou a kana om hiuhiau a leh chu mihai tuk himai ding kahi, aveng chiah lou achih te uh tawh kibang phial ding kahi.

Huchimahbang in, Jesu Christ hong pai nawn hun ding leng kuaman athei kei ahi…. I changteel in I lamet louh laitak a hong pai ding ahi chih ahon hilh ahi.

Matthai 24:36 “Ahihhangin, tua ni leh tua hun kuama’n a thei kei. Vantunga vansawltakte’n zong ka thei kei. Ka Pa kia in a thei hi.”

Jesu Khrist hong pai nawn ngeingei ding ahi chih a theilou omdin kahon gingta kei ahi. Nasepte 1:11 Noute apan vantunga kilatou hiai Jesu mah, vantunga paitou na muh bang teekteekun, hong paikik ding ahi,a chi uhi.

I damsung a hong pai louh tawp inle, sihna in ih tungah vai hon hawm thouthou dia, thukhenna maiah I ding thouthou ding ahi. Jesu Khrist hong pai hun ding i theih louh mah bang un, I sih hun ding leng i thei tuan sam kei uh ahi.

Huaiziakin, denlama i gensa mah bang in, ei gingtute adia lungmuan huai pen leh pilhuai penpen chuh banghiam ichih leh ginom leh taima tak a Bible changte sim gige a, Pathian thute atam thei pen lungsim a chiamteh a, huaite i hinkhua a zat ahi. Bible chang sim gige bang ziaka poimoh hiam ichih leh, dan leh thupiakte I zuih theih na dia I theih masak apoimoh bang geih ahi. Thil I zak ngeilouh, I sim ngeilouh pi bangchin’ I zui thei himhim dia..Awm le awm lou chi ua…Piang vet lou ding hi achih te uh hiding dan ahi. Huaiziakin, Bible chang sim gige ding leh atamthei pen lungsim a chiamteh ding in chih taktak in ka hon ngen ahi. Jesu Khrist nangawn inle Bible chang tampi a byheart ahi. Matthai 4:1-11 na ah Jesu Khrist khema aomna imu ahi.Setan in Jesu Khrist a khemna te Jesu’n Bible chang ngen in a dawng ziahziah a, huaitak in Setan inle Bible chang zang in ahon khem sawm nawn a, Jesu’n Bible chang mah zang in a dawng nawn a, Setan a vuallel ta hi.

~ Khemna khatna: “Nang, Pathian’ Tapa hi vechin, hiai suangte tanghou suak dingin thu pia in, a chi hi.”

-Dawnna khatna: Deuteronomy 8:3 “Tanghou kiain mihingte nungta lou hi, ahihhangin, Pathian’ kama thu pawt teng apan nungta zaw ding uhi, chi a kigelh ahi, a chi hi.”

~Khemna nihna: “Nang Pathian tapa hi vechin, kilawnkhesuk in. Psalm 91:11-12 “Ama’n na tungthu-a a vansawltakte thu pe ding a, suang na suihkhak louh nadinga amaute’n khuta hon na dom ding uhi, chi-a na kigelh hiven, a chi hi.”

-Dawnna nihna: Deuteronomy 6:16 “Toupa na Pathian ze-etin na enkhe ding ahi kei, chi-a zong kigelh ahi, a chi hi.”

~Khemna thumna: Dawimangpa’n mual sangpi tung ah amah a paipih leuleu a, leitung kumpigam khempeuh leh a thupina khempeuh a ensak hi. Tua khitin, dawimangpa’n a kiang ah: Bokin kei hon be lechin, hiaite khempeuh hon pe ding ka hi, a chi hi.

-Dawnna thumna: Setan Paimang in! Deuteronomy 6:13 “Toupa na Pathian kia na biak ding, ama’ nna kia na sep ding ahi, chi- a kigelh ahi, a chi hi.”

Huaiziakin ei Jesu Khrist nungzui ten le Bible chang atamthei pen I lungsim a ikoih ding uh ahi.

Matthai 24: 45-51 na ah Sila nihte apan etsakna imu uh ahi. Hiai etsakna hi Sila muanhuai leh pil toh Sila muanhuailou leh hai chile le apoina om din kathei kei ahi.

Hiai etsakna hichin ka hon gen ding:

Mihausa khatin sila a la ut a, advertisement ava bawl leh lawmta nih in newspaper tungtawn in ana simkha ua, a resume chiat uh tawh mihausa pa mudin hong kuanta uh hi. Amun ahong tung ta ua, mihausa pan a resume uh a etsak chiangin paih zawk disam thei lou in lungbuai mahmah a, atawp in alungsim in hichi in thupukna hon lata ahi. Lawmta nihte asam khawm a, pai phot unla zingchiangin tuhun mah in hong pai nawn un nikhat ninih khawng na training phot uh ngai in teh chi in apaisakta hi. Azingchian in kilawptakin anih un hong kuan nawn ua. A pu un sep ding na anihtuak un anapia a, bangmah gen lou in apawt mangsan vengveng hi. Huaitakin, a thulimlou zaw pan kapu hong tung zok kei na in teh chi in zukhamhatte toh nuamsatak in ahun ana zang ahi. Himahleh alawmpa bel aginom a, nasepdi piak a om bangbang ana sem hi. Huchihlaitak in a pu uh ahong tung guih a, ginomtaka nasem silapa amuh in akipak mahmah a, aneih leh lam te tung a thunei a koih ding achiam hi. A ginomlou pa kiangah bel tumnih ka hon suah ding achi a. Bible in lepchiahte mun piakin a omdia, huaiah kah leh hagawina om ding achi hi.

Khrist a unau iit tak te aw, Jesu Khrist hong pai zok kei na in teh chi in, I ut dandan in om kei ni, ka damthei laina chi in muam theih muam moh teng, nek theih nek moh teng, dawn theih dawn moh teng, hih theih hih moh teng hih kei ni uh. Hun tawpni chiang a na zukham kal a Jesu Khrist hong pai khak ding lau lou na hiam? Na zu hai ziak, na khaini muam ziak, na laizial tep ziak, na thulim louh ziak hiam a natna hoihlou pi vei a sihna na tuah mai ding mulkimhuai sa lou na hiam? Nang le nang leng ki iit lou na tel hiam?

Huaisang a, Jesu Khrist hong pai chianga Biakinn sung hiam a Bible nana simlai tak khawng a hong tuah khak ding ut zaw lou na hi hiam? Bangzah ta a nuam ding hiam?

Hinkhua siangthoutak, Pathian deihlam a zang a kipaktak leh kinepna thak toh hiai I khualzinna leitung nutsiat utzaw lou nahi hiam?

Unaute khawphawk lou a omhun hinawn lou ahi. Jesu Khrist hong pai nawn ngeingei ding ahi. Huai hun a hing leh dam a ina omleh I Toupa tuak din iki man hiam? Jesu Khrist hong paima a Sihna ten I tung a vai hong hawm tak aleh zong, tun zaw sileng le vangam ka kai ding I chi taktak ngam na diam?

Unaute, thupukna thak ladin iki chial ahi…Pathian kiangah kitulut thak nawn ni. I theih louh kal a lam saupi ana pialkha ihi kha ding. Toupa na hong pai hun hun a hon tuak dia kiging sa a om gige ut kahi chi in Toupa hilh ni. Tuhun a thupukna na bawl keileh, nakisik tuntun hun hong tung ngeingei ding ahi.

Hiai khovel buaitak lakah, kiging gige a om thil hithei hiding hiam na chi mai thei. Unau thil hithei ahi, nang ah kinga ahi. Thumna toh pang tawntung in, Pathian thute I lungtang ah koihna le, lampial lou din Aman honpi ding hi.

Mihing hinkhua galdou hinkhua ahi, himahleh ei gaal dou zaw sa leh sisan ahikei a, khalam galdou ihi uhi.Tanglai a Israel te leh Amalek te akidou lai un, Mosi in a khut a liik touh chiang in Israel ten a zou ua, akhah suk chaing in Amalek ten a zou uh ahi. Huchi mah bang in Thumna toh pang a, Pathian eilama apang nak leh gaal I zou dia huchi lou in zaw I vual lel ngeingei ding ahi.

Thumnna toh pang kawm a, niteng khemna te tung a vual zawhna ei a ahih chiang in kiging gige in I omthei ta ding hi.