Philemon kianga Paula laikhak

Philemon kianga Paula laikhak
Laikhak a min omte:

Paul: Paul ahih leh Khrist Jesu’ hentapa (Prisoner of Christ) ahi. Pathian thu a tangkou pih ziak in Rome gam ah suangkulh a khum in a om.
Philemon: Philemon ahih leh Kollosa khua a om, gingtu mihausa khat ahi. Inn lianpi a nei a, huaiah Kollosa khua a gingtu omten Pathian biak khawmna anei jel uh.
Onesimus: Onesimus ahih leh sikha lepchiah a pu Philemon apan taimang ahi. Rome gam ah Paul toh suangkulh atang khawm ua huaiah Onesimus in Pathian thu hon awi pan hi.
Apphia: Bible siamte gintakdan in Apphia ahihleh Philemon zi ahi.
Archippus: Archippus ahihleh Philemon leh Apphia te tapa ahi.
Timothy: Khalam a Paul tapa Timothy ahi.
Epaphras: Paul lawm hoih mahmah, Kolosate kianga Pathian thu gen Epaphras ahi.
Marka: Marka ahihleh Barnabas’ tupa (Barnabas’ sangamnu tapa) ahi.
Aristarchus: Paul kolbut pih leh a lawm hoih ahi.
Demas: Timothy nihna 4:10 a kimu bang in Demas in Jesu nungzuihna sang in leitung nopsakna a tel zawk ziak in Paul ana taisan ta.
Luka: Mi kingai niam tak leh Pathian gam nasepna a Paul panpihtu muanhuai ahi. Khovel siamna lam ah Luka ahihleh doctor ahi.
Thumapi: Hiai Philemon kiang a Paula laikhak ahih leh Bible a lekhabu tom mahmah te lak a khat ahi. Chang khat apat 25 tan chauh ahi a, khat vei sim a simsuak hiau theih ahi. Zil (Study) thoh lou a na sim (read) thoh leh hou nasa sim maithei aziak chuh hiai laikhak mimal thu ahih ziak in. Bangziak a hiai mimal laikhak Bible a telkha ahi dia aw nachi sawnsawn maithei. Alangkhat lam ah, hoihtak leh nounel tak a na sim leh hiai lekha bu apat zillai zilding aki selgu tampi om ahi chih namu ding. Hiai zillai te zil a hamphat pih hiai laigelh tupa tup leh ngim ahi.
Zillai: Ki lemnawn na, itna, mimal kizopna, ngaihdamna chih te ahideuh. Pathian’ lemgel hotdamna Onesimus, Paul leh Philemon te hinkhua apat in a muh theih.
■ Hiai anuai a thu laktom na sim ma in Philemon laikhak simsuak lechin a phatuam mahmah di.
Onesimus ahihleh sikha hingei miginom lou, a pu Philemon apan taimang ahi. Sikha ahihna apat taisia in Rome ah suangkulh ava tang hi. Hiai mun ah sawltak Paul toh hong kimu kha ua, Paul thuhilhna tungtawn in Onesimus gingtu ahong suak hi (Philemon 10). Onesimus suangkulh atan hun abei tak in Paul in Khrist a alawm hoih Philemon leh Kolosa khua a saptuam te ading laithon a gelh a, huai paw ding in Tychicus toh Onesimus a sawl hi (Kolosate 4:7).
Onesimus a ding in a taikhiak sansa a Pu Philemon kiang a va kik nawn ding chih thil mullit huai leh kilawp huai loupi khat ahi, aziak bel Philemon in a ut bangbang ana lawh thei ahih man in. Paul in Onesimus pen mihoih lawta ahih man in amah kianga omden leh chih adeih hi. Mithak ahong suah na ziak mah in Paul in suangkulh sung a amah panpihtu ding in Onesimus deih hi, himahleh Onesimus mithak ahong hihna pen Philemon mahmah in atheih pih adeih sese ziak leh Philemon lemaskna tel lou a bangmah ahih utlouh ahihziak in Onesimus sawlkik ahih dan hiai laithon ah Paul in a taklang hi (Philemon 13-14).

Paul in Philemon kiangah Onesimus in ginomloutaka a taisan na pen mi gin om leh mi hoihsa a hong kik theihna dinga thil tung ahizaw chihin laikhak ah agelh hi(Philemon 15). Paul in kei Khrist a na lawm kahih mah bang in ka hon sawl Onesimus leng kei nonna vaidawn ding bang in ana vaidawn inla a hon khemnate leh leiba hon neihte a omleh ken amoh ka pawvek ding chi hial khop in Onesimus mihoih ahihdan a tangkoupih ngam hi. Onesimus pen sikha bang a nei nawn lou a, sangam itna toh ana kem ta ding in Paul in Philemon a ngen hi aziak bel Onesimus Toupa lam ah deihthawh ahih tak ziak in (Philemon 16).
Ngaihtuah ding:
 Paul, Philemon leh Onesimus te hinkhua in Christian hinkhua a mohpuakna thum om ahihdan hon sinsak.
 Paul bang a palai hihna: Jesu Khrist toh kilemna neinailou te ading a palai hihna leh mimal kal a kilemlouhna neite kilemsak nawn na.
 Philemon bang a ngaihdamna hau: I tung a khial te ngaidam a sangamte I it banga itna. Melmate it tanpha eileh ei iki it bang a it ding in Toupan’ hon deih hi.
 Onesimus bang a khelh thupha tawi leh thumanna: Onesimus in nial het lou in Paul thuhilh bangbang laithon Philemon kiang ah ava pia chih imu.
 Nang leh kei leng Pathian maiah Onesimus ihi.
 Pathian apan in I gitlouhna te ziak in ina taimang ua, himahleh Jesu Khrist tungtawn in Pathian toh kilem nawn theih na ding lampi honsak in I om uhi. Onesimus bang in kisik in Pathian thu I mang hia?
 I hinkhua ah khasiangthou thilhih theihna mun I pia hia ahihkeileh eimah theihna leh hatna in thil hih I sawm hia?
 Paul in Onesimus leh Tychicus laithon paw ding in a sawl chih Kolosa te 4:7 ah imu. A lam paina lamsuk lamtou, sun leh jan a panpihtu ding leh hehnemtu ding in Tychicus sawl in a om. Hiai ah Onesimus in phun het lou in Tychicus toh a hoh na ding mun uh kituak tak in a hoh khawm uh.
 Pathian a ding in thil hithei lou a om kei.
 Mihing ngaihtuah na kia mai a ngaihtuah in Philemon a ding in Onesimus a sangam it bang a pom ding thil haksa mah mah ding ahi.
 Onesimus ading in leng Philemon kiang a va painawn zah lak huai mahmah ding hi.
 Khrist a I om chiang in khentuam a omkei.
 Suak leh sal a kineihna Khrist ah a omkei.
 Pasal leh numei khentuam omlou.
 Mivom leh mikang khentuam omlou.
 A zawng a hau khentuam omlou.
 Khrist ah pumkhat ihi uh.
 Pathian lemgel hotdamna.
 Etsakna ding in:
 Philemon apan taisia Onesimus ahi, mihingte Pathian apan I taisiat bang un.
 Paul in Onesimus sik leh tang in ngaihdam a ngetsak, a thil hih khelh tengteng Paul in moh a pua. Jesu Khrist leng eite tan ding in hong pai a I khelhna tengteng hon puak mang sak.
 Onesimus in Pathian a gingta a Philemon toh aki lem nawn bang un, mihing te leng Jesu Khrist I gintak apat Pathian toh kilem in I om uhi.
 Jesu Khrist na gingta hiam?