Thil thawnpiak

Thil Thawnpiak
David P Neihguk

Amun ahihleh IIT Madras Alakananda Hostel, Room number 148 ahi. Hiai room ah nikum August kha apatin kana omta. Ahun ahihleh January 14 2009 sun nung lam ahi. Nidang banglou takin hiai ni in huih hat simsim in a nung mun mahmah hi. Huihnung in ka tawlet ahon phak ma in ka room kiang a singkung om ten' huihlum teng ana kidiik huan masa ua, aman bei in huihvot hiauhiau hon diiksak zenhouh uhi!

Anop mahmah ziakin Zo Huihkhisiang hong leengla hia kachi hial hi.. Ka lungsim in!

Lungleng sim kahi dia dohkan a nasem dia katut kawm in Thangboi Mangte in asak Leen Heisa album a late ngaih lawlou in ka ngai kawm hiauhiau hi. Hun sawtlou katut nung in ka 'melmuhlouh tongsaan na'(mobile phone) ahong ging a..."Lal tuni a 'Daak Inn'(Post Office) a navan di khat hongtung inchin vala kei ve". Lamdang sa kawm in bang van eita kachi a, "mobile phone ahi", Kua hon khak a? "Theilou kua hon khak ahidiam ah Delhi apat hileh kilawm", A hoih te hia? Camera om hia? Bluetooth om hia? Memory card om hia? Ear phone om hia? ka ban dot zungzung hi. "Om mah e, memory card 1 GB toh om, kon khak suk di ua?" hon chi a, honkhak dah mai ua Pa, kanau in ana zang mai heh.. Omnuam chiin ka phone kakoih hi.

Lamdangsakna leh kipahluatna in kadim a, alehlamah kua honkhak a mahmah dia aw chih theihlouhna in kahawm heuhou hi. Ka omdidan le kathei zou kei phial a keikia in hampha nachia nangpa kichi in keilehkei kaki nuihsan cheuchau hi. Toupa hiai thil manphatak hon petu kua ahia chih theikei mahleng nang nathei vek chih kathei hi. Hiai thil thawnpiak nang apat ahi chih katheih ziak in kipahthu kon gen, thumna in kachi hi.

Mihing hihna ziakin kuapeuh thil athawn a muh i ut un i kipahpih chiat uhi. Mi pawlkhat ten' sum leh pai athawn a muh(semlou a muh) theih nang in neekguk a chiing ua, khenkhat ten' guktak a chiing uh. Pawlkhat ten' kizuak a chiing ua, khenkhat ten' zuaugen a chiing uh. Bible in "Khelhna man tuh Sihna ahingal a Romete 6:23a" achi a. Amauten' tangtawn hinna sang in khovel nunsung tomchik nopsakna ana teel zaw uhi.

Hiai khawvel kitaitehna ah thil athawn a muh theihnang in nakpitak a tai ngai hi. Hiai in khovel thilhimhim athawn(manbei) kichi om mawk lou ahihdan hon hilh hi. I theihna tengteng, siamna tengteng leh pilna tengteng toh pang a thathak lak tawntung ngai hi. Mi pawlkhat te hiai thil athawn a muh ding zia zong in hambang vai uh a, athawn a pe pa Toupa phawk man lou uhi, laphuaktu in chi hi.

Khovel thilte suan man leh mahni mimal ki pahtawi utna ziak hi hetlou in, Pathian in kei a dia thilhoih tampi hon bawlsak te ka sutsut chiang in kipahna in kadim a, lungdamna khitui in hon tuum sek hi. Hiai ngei leng ka kipahna luanglet, laitui a hong luangkhia laipuan a simtheih dia hong om ahi zaw.

A phatna la ka sak chim theihlouh, A hoihna ka gen senglouh leh A zahngaihna ka suut senglouh Pa hon itna khupzou ding omlou hi. Amah Kumpi te Kumpi leh Angel sangtampite tunga thuneipa'n kei mikhial, genthei leh liangvai leltak Sing Khros tunga a sisan manphatak toh honglei tel...!

Maizen! hiai sanga thil thawnpiak thupizaw a om dia hia lawm aw, sang loulai ding nahiam?

Thupiak chiamnei

THUPIAK CHIAM NEI
David ptl neihguk.


India malsuah bial a om khopi nuam leh etlawmtak, suah leh tum, simleh mal a mual kilawm taktak te’n a um kiimvel uh, Zosuan mipil misiam tampi te khanlet na mun, lia leh tang te lungtuak nga bang a len na mun, lungdeih teng libang chin na mun, laphuak tu in anop dan Vangam “ Paradise” toh a teh hial.. bang dang hilou in Lamka vangkhua ahi.

Hiai khua ah lawmta Papi nih (Thangpi leh Siampu) veng khat ah a tengkhawm uhi. Sahkhua lam ah a ginna uh a kibat ziak in Biakinn khat ah a kai khawm uhi. Anih tuak un Pathian lau mi ahi ua, Saptaum committee member a pang in Pathian’ na a sem uhi.

Thangpi in Ta Li (four) numei nih leh pasal nih anei hi. Atanu upa pen in US ah Micorsoft company a nasem in a om hi. Atanu khat pen ahileh Sydney Australia ah Bible zil in a om lel hi. Atapa upa pen ahileh DMO (District Medical Officer) ahi. Atapa khat pen in MIT (Massachuset Institute of Technology) US ah Phd a sin lel hi.

Siampu in ta nih kia numei khat leh pasal khat a nei hi. Atapa pa amah a dia tapa tang neihsun himahleh khamtheih hih a tawpsan theihlouh ziakin Rehabilitation Centre ah a koih hi. A tanu nu adamtheih louh luat ziakin pawl sawm le zouman lou in School kai a tawp a, ahun tam zaw lupna tung ah azang bei hi.

Officer khat himahleh, Siampu in kha sum asang te damdawi man leh atapa pa tung ah a zang bei zel hi.

Pathiani khat kikhop tawp in lawmta nih tegel a hong houlim uhi. Nidang lai a High School akai khawm lai hunte khawng kikum khawm in Lungzuan huai asak dan uh khawng agen khawm uhi. Sawtlou a houlim khit un apau masa dih kikhiat uh hileh kilawm tak in a hong dai dide uhi.

Thangpi in a lawmpa mit apan khitui hongluang khia tuh amu ta hi. A romol kuah ahon lakhia a, a khitui anul sak kawm in “lawm bang ziak a kap na hihiam?” chi in a dong hi. Siampu in awlkha in kuamah kiang a akupngam louh a puakgik tuh a lawm hoih mahmah Thangpi kiang ah hichi in ahon gen ta hi.

“Lawm Thangpi aw, ken ka neulai apat nang bang a Pathian thu ana limsak ing a, Sunday School bang hoihtak a ana kai ing a, Tuailai lam ah leng committee member tanpha a Pathian na ana sem ing a, khaloh ka san nung a leng sawm a khat ka piak gige banah ka Papi nung nangawn a leng Saptuam Committee member a kahihtheih tawp suah a pang ing a… Hiai bang teng a ka hinna Pathian a dia kapiak nung a ka innkuan sung a thil hongtung te kangaihtuah chiang in ka thesiam him him kei.”

Hiai agen khit in nul seng vual louh di’n amit apan khitui hong tak khe zungzung hi.
Thangpi inle a hehnep didan thei tuanlou in a romol ahon sawk khe nawn a, alawmpa khitui a nul sak kawm in Pastor pa kiang va pha him him di’n a chial hi.

Siampu in Pastor pa kiangah hichi in a hon gen hi. “Pastor pa aw, mite’n Toupa hoih hi, Toupa lian hi chi a nuamsatak a laa a sak lai un ka innsung a Toupa hoih na alat louh kangaihtuah chiang in ka theisiam kei.”

Pastor pa’n dawnna apiak ma in hichi’n a hon genbeh lai hi. “Pathian gam nasep na a hichizahta a ka kipumpiak nung a hiai bang thil ka tuah lawmlawm……” aban genbeh thei nawn louin a kap hup-hup ta hi.

Pastor pa’n, Siampu aw I biak Pathian in Vaan apat direct in kuamah kiang ah vualzawlna ape ngei kei, aman I piak ngai hi. Nang na hileh aman pekhinvek in na ki ngaituah kha maithei himahleh Ephesate 6:1-3 na ah “Na nu leh napa zahtak in (hiaituh thupiak chiam nei masa pen ahi). Huchi in nang a ding in ahoih dia, leitung a khantou a nuamsa ding nahi uh chih ahi.” Ref. BSI (1) leh BI

Pastor pa’n hiai ahon sim khit tak in Siampu in nidang a ana theih luatsa Sunday School a le a by-heart sa changvom himahleh nidang a ana ngaihsut khak ngei himhim louh dotna a lungsim ah hong kilang ta hi. Huai dotna tuh hiai ahi. “Ka Nu leh Pa ka na zahtak hiam?” chih dotna in abil ahong khawng nilouh hi.

A Nu leh Pa zahtak ding bangtak a ana zahtak khalou ahihdan ahong kiphawk a, mehlim salou a ankuang a ahan lai khawng, Nu leh Pa thuhilhna ngaihsak lou a Zi ava guuk lai khawng … Tua lah a Nu leh Pa om nawnlou, poi asa mahmah a kisikna in a pumdim ta hi.

Siampu in a Nu leh Pa ana suk lunggim khak nate ziak a hiai bangteng tuak ahi chih ahon theichian ta a, kisik mahmah in Pathian kiang ah ngaihdam a ngen ta hi.

Tuapat kumnga nung in Siampu’ tapa pa’n pianthakna hoihtak ahon nei hi. Thugen siam mi ahih ziakin Evangelist minthang khat ahong suak hi. A tanu nu leng hong dam siangta ahihmanin a Nu leh Pa teekta te panpihtu leh sukipaktu hiding in laisim sunzom nawn tuanlou in a U toh a insung uh Pathian deihna banga pii kawmin Nu leh Pa pahtawi ding in ahong hanchiam ta uhi. Huaituh THUPIAK CHIAM Nei masapen ahi ngal a.

Moral: - Leitung Pathian Nu leh Pa te zahtak a, pahtawina piak ding ahi.

Hiai article phuahtawm ahi a, akibatpih kuahiam a omkhak zenzen leh na ngaihdamna kahon ngen.