Khatvei ka College Post office ua passport application form submit dia kava hoh leh Sub Post Master nu'n nang koi apat hong kipan e? ahon chi mawk hi. Ama gintak dan a bel Chinese te khawng hidia hon koih hihtuaks, India mi hidia hon koihlou himhim. Lamdang kei maw!!!
Ka document te hoih tak a hon etchet khit nung in, present address proof certificate hostel office apat lak di pen ka theihlouh ziak in kana lakha kei a, huai banah ka form fillup na ah leng gelhkhelh bangzah hiam ka neih ziak in application form khat ka lei thak hi. Inn lam te sumkhak di ka neih ziak in SBI ah ka bang phei a, vual(line) a sawtsim ka din khit nung in hihdi theihlouh man in ka dak velvel hi. Kongkhak ka et toh kiton in College a ka muhmuh sa Korea te khat kinoh sim in a hong diang lut fefu a, form tuamtuam kikoihna mun apat form alak zoh in ka dinna gal langkhat lam gamla lolou ah ahong tu hi. Chim thoina a mi gamtat dan et chih khong ka hih theih viau khat ahih manin hoih tak in a gamtat dan ka na envel hi. Bang pentak hih dia hong hoh ahi dia aw chih khawng ngaihtuah kawm in ka en zom jel hi. A form fillup din ahong kisa petmah a, kizen louh man hituan lou in pen a tawi kha kei hi, akiang a tute kiang a anget ngam pah louh ziak in a buai gu sim mahmah chih amuh theih hi. Atawp in akiang a tupa kiangah na pen na hon zangsak thei diam chi hilkeh kilawm tak in bang hiam khat a gen phei leh mipa'n a gen a theisiam zok kei zomah lai hi. A pen tawi ahon kawk tak hial in bel atheisiam khong hi.
Buaise gawp petmah ta ahihman in kei ahon enphei a, ka bag puak (second hand hizawmah) a Korea pau a thil kigelh amuh tak in angaihtuahna a hiai pa chu Korea te hi ngeingei di chi ahi dia Korea pau in ahon houpih a, keile mitheih a hiai pa Korea tetoh kihou chi a kipaak gu sim mahmah kahihman in a gen limtakin ka ngaikhia hi, a pau tam dedeuh leh ka buai dedeuh a, himahleh mi zak a na gen ka theikei va chih di ka ut louh ziakin(Eile ki Korea sak ut thou ihih chia) pautheilou bangin kaki entuah kelkul kha nilouh uh hi.Ki Korea sak ut mahleng a poimoh penpen, a pau thei talou kahih manin Korea louh mai angai hi. A tawp inbel ki Korea sakin banglou teng kisa mahleng hilou kahih maimah chia chi in sih leh sih dam leh dam in Zomi kahih dan kathei sak khong hi. Aman le lamdang asa petmah a, akam bang aka heuhou zezen hi! Lamdang asak luat ziak in ka bag kawk kawm in nang maw Korea te nahih louh?? ahon chi hial hi. A awphawi atuam luat ziak in sappau a pau himahleh agen ka theikhop teek hi. Ka hon panpih thei diam? Bang hih dia hong hoh na hiam? chi a ka dot leh hostel fee piakna dia demand draft la ut ahih dan ahon hilh hi. A hih didan bangkim kahilh khit in bang jil a om? bang tan om di? chih khawng ka dot leh B.Tech(Mechanical) zou jingchiang a Korea zuan a paidek ahih dan ahon hilh hi.
Hichi dandeuh thil katuak mun simta a(noule natuah khak uh kaging), ka ngaihtuahna ah bangchik chiang in min' ka sakmel latdan ziak hiam, ka bag a thil kigelh ziak hiam, ka puanak silh a Zo Vakhu kop lem a tuan ziak hiam, Zo pau a ka pau ziak hiam, ka mihinzia ahoih ziak hiam, ka kamsiam ziak hiam, mi ginom kahih ziak hiam, dawntheih(Zu) teptheih leh muamtheih ka hih louh ziak hiam in Zogam apat hong kipan Zomi na hi hia? ahon chih ni uh ahong tung dia kachi sek hi. Nepali, Chinese, Korean, Japanese te khawng sak a om ka chimtaak lawta. Huaisang in Nepali, Chinese, Japanese, Korean te khawng min' Zomi di asak hun uh ngaklah huai kasa hi. Huai din tuni a ei khangthak Zomi ten' Zo sunga pau tuamtuam i neihte uh amasapen a koih lou a Zomi hihna mah amasapen a i koih uh hunta hi.
Hun hong pai zel ding ah leng Chennai ah Zomi te i hong tam deuhdeuh ding ua, tunung chiang a hiai khopi a hong khosa ding i unaupihte tung a thiltung thei(a hoihlou lam) etsakna din simmoh bawlna, muan ngam louhna, engbawlna leh adg mite(khotualte) apat omthei thilte tuni a ana khosa nang leh kei tungah kinga hi. Huaiziakin, mi ahonthei ngeilou ten' Zomi melpu Christiante ihih ziaka ahon zahtakna(dignity) te uh i kepbit uh poimoh petmah hi. Christian kichi napi a 'Tian hualoupi a i khosak uh leh bel ahon koihdan uh tuam riau din ka gingta hi. Lamdang kasak leh ka puaknat mahmah khat bel hotdamna kitheichian Baptistma tangsa lah hi himahleh tep leh muan, nek leh dawn a kidek thei hetlou bekthamlou a kisiamtan lai zawsop thei Christian tampi i om uh poi kasa petmah hi.
Kei mimal a katuahsa ahih ziakin ka hon gensau zek di, Lamka khopi a khangkhia kahih dungzui in teptheih, dawntheih, muamtheih, hiiptheih chihte kana hih khasaam hi. Thilkhat ihih zongsat sa va tawpsan chih thil haksa mahmah khat ahi chih ka zil khiat lawh hi. Himahleh tup taktakna leh khasiangthou panpihna toh ngolh I sawm taktak leh tawpsan zohlouh khat le a omkei chih hangsantak in kachi ngam hi. Kuamah ka chihtuamna hilou keimah kaki chaphouna le hituansamlou in Khrist nei taktak ihih in zaw kikhekna le a omzek ngai ahi(“Huchih ahih jiakin, kuapeuh Krisa a om leh, thilsiam thak a honghi a; thil luite a mangta a; ngai un, a hongthakta uhi.” 2Korinth 5:17). Thilchiin hoihlou tawpsan theilou te kianga ka gen ut ahihleh nangma hatna muang a na tawpsan sawm leh na lawhching ngei kei ding a himahleh Pathian panpihna ngen kawm a nangmah chihtak na toh na pang leh thil haksa lua a omkei ding."Jesun amau a ena, Huaijaw mihing din hih vual ahi keia, Pathiana din bel hihvual louh ahi kei: Pathian adin bangkim hih theih ahi ngala, a chi a." Marka 10:27
Sau ka gelh law kha,Ithupi uah I lut nawn di uh.
Ei ana om masaten' khotual te kiang a ngaihdan hoihlou/diklou(bad impression) i piak ua leh "ken Innlam a Nepali te Teisiang tang leh Gelmoul tang khawng a Bawng ching a ahong khosak ziak ua Nepali tengteng bawng ching dia kana koih nilouh dandeuh in," mi tengteng huchi dia hon koih thei uh ahih man in Christian kichi ngal a 'Tian loutak a khosak Pathian deihlam ahihlouh banah tunung chiang a thil hoihlou tuntu hikha thei ahihmanin, hiai tungtang ah kuapeuh pilvan huai mahmah kasa hi. Pupate' thugousiah manpha pipi ineihte uh leh Bible toh kituak in i hinkhua uh zatdan siamle mite tungtawn in Pathian vualzawlna tampi i don beh lai ding uhi.
A tunga ka gelh te ziakin khatveivei bangziak a Zomi a ana piang kha sese ka dia aw? chih dotna haihuai pi kana kidong zel hi. Chinese/Japanese/Korean khong in ana kipiang kha henla, khopi nuam deuh khat ah kikhosa leh chih khawng suangtuah na ka neisek hi. Himahleh ka kipahna thuguk ka genchim theihlouh khat ahih leh Khovel leh asung a thil om tengteng siamtu Pathian in Zomi a hong piangsak a, kei mikhial leltak hon it a, tangtawn hinna a tapa Jesu Khrist tungtawn a ahonpiak ka ngaihtuah chiang in thupi kasa a, Namdang kuadang ka engnawn tuankei hi. Laphuaktu in "Zomi kahi zumpih keining, misang a niamzaw din Pasian hong bawl hituan lou" achih mahbang in Zomi kahihna zumpih lou in ka sial zawta hi. Zomi hidia hongbawl Pathian min kaphat hi. Hiai ahi hamphatna ka chih.... Zomi na hih hampha nakisa hia??
Abou Ben Adhem- Leigh Hunt
15 years ago
